O Concello de Narón asina diversos convenios de colaboración

A alcaldesa da cidade de Narón e presidenta do Padroado da Cultura, Marián Ferreiro, asinou este venres, día 22 de abril, tres convenios de colaboración cos representantes da Sociedade Cultural e Recreativa A Pombiña, de Pedroso; a Sociedade Cultural Areosa, de Piñeiros e a Asociación Memoria Histórica Democrática.

A través do Concello de Narón e do Padroado da Cultura, entidade a través da que se rubrica o último dos acordos, realizarase unha aportación económica que en conxunto ascende a 11.500 euros, tal e como indicou Ferreiro.

O Consistorio colabora coa S.C.R. A Pombiña para a cesión das instalacións da entidade no ámbito da promoción cultural e o desenvolvemento de actividades vencelladas a esta área e ó tempo de lecer. Deste xeito, ó igual que se fai nos últimos anos, nas instalacións de A Pombiña, en Pedroso, seguiranse executando programas e actividades impulsadas dende o Concello e destinadas á totalidade de veciños desta parroquia.

O convenio asinado coa Sociedade Cultural Areosa permitirá continuar promovendo o desenvolvemento social e cultural das persoas da cidade a través de diversas actuacións no citado ámbito. Así mesmo, dende Areosa cooperarase coa programación municipal, impulsando propostas teatrais, de música coral, o tradicional certame de habaneras, actos con motivo do Día das Letras Galegas…

A través do convenio entre o Padroado da Cultura e a Asociación Memoria Histórica Democrática renovarase a vía de colaboración, destacando o interese social do labor investigador da entidade. Entre as mesmas, contémplase a edición e recompilación de documentos depositados en arquivos e a potenciación de estudos relacionados con contidos sociais, históricos e culturais.

A alcaldesa destacou o traballo que as tres asociacións realizan dende hai anos na cidade, tanto no ámbito da promoción de actividades encamiñadas a preservar e difundir a nosa cultura e patrimonio como de cara a manter viva parte da nosa historia. Ferreiro destacou a implicación das tres entidades na vida cultural municipal e animounas a continuar traballando como o veñen facendo nos últimos anos.