Ferreiro recibe ó novo comisario da Policía Nacional da Comisaría de Ferrol-Narón

A alcaldesa de Narón, Marián Ferreiro, recibiu este luns, día 31 de xaneiro, no seu despacho ó novo comisario da Policía Nacional da Comisaría de Ferrol-Narón, o compostelán Javier María de Loresecha.

A rexedora local estivo acompañada na reunión polo concelleiro de Seguridade Cidadá, Román Romero, e o xefe da Policía Local de Narón, Eduardo Pita.

A xuntanza programouse con motivo do recente nomeamento de Javier María de Loresecha, que tivo lugar o pasado día 10, en sustitución de Carlos Soria, actualmente comisario provincial en Cáceres.

O encontro foi unha primeira toma de contacto entre Ferreiro e De Loresecha, e tras manter este último un encontro a pasada semana coa subdelegada do Goberno na Coruña, María Rivas, para coñecer a situación da comarca en materia de seguridade cidadá.

Ferreiro deulle a benvida ó comisario felicitándoo polo novo cargo e a súa dilatada experiencia profesional, e ofreceu a máxima colaboración do Concello para continuar traballando conxuntamente en materia de seguridade cidadá.

A alcaldesa e o comisario coincidiron na necesidade de convocar unha xuntanza en canto sexa posible para abordar diferentes temas vencellados á citada área, se ben Ferreiro aproveitou a reunión para trasladarlle os últimos problemas que en materia de seguridade cidadá que se están rexistrando na cidade.