Galicia Ártabra Digital Noticias de Ferrol y la comarca de Ferrolterra.
Iván Rivas, portavoz municipal do BNG, advertiu que o Concello de Ferrol, «por terceiro trimestre consecutivo» excedeu o período medio de pago a provedores, situándose en 39,79 días, superando os límites estabelecidos, tal e como se informou na comisión de Facenda celebrada esta mañá.
Esta situación ven derivada «do proceso de adelgazamento das administracións públicas que xera alarmantes carencias de persoal e que se traduce nunha incapacidade manifesta para poder tramitar os expedientes e informes máis ordinarios e cotiás como son o pago das facturas«, sinalou.
Iván Rivas instou ao alcalde da cidade «a sair da situación de parálise na que se atopa deixando pasar o tempo e sen adoptar ningún tipo de medida para correxir esta situación que se prolonga desde o inicio do ano«.
Desde o BNG insisten na necesidade «de incrementar o persoal municipal e asumir a xestión pública dos servizos, algo que redundará en beneficio dos veciños e veciñas e do funcionamento da administración local«. É por iso que instan ao goberno municipal a cubrir de xeito inmediato as prazas de persoal que ten vacantes o Concello para reforzar a xestión pública dos servizos municipais.
