Galicia Ártabra Digital Noticias de Ferrol y la comarca de Ferrolterra.
O Concello de Ferrol, a través da concellería de Benestar Social, que dirixe Eva Martínez Montero, ven de entregar aos cinco comedores sénior da cidade —Río Xubia, Caranza, Esteiro, Catabois e Canido— numerosos xogos de mesa para os maiores que cada día acoden a comer a estas instalacións municipais. En concreto, a concelleira levou xogos de damas, xadrez, palabras cruzadas, tabú, bingo, cartas, dominó, parchís e tamén exemplares da oca.
Trátase dunha iniciativa municipal que busca “mellorar o día a día” dos usuarios dos comedores do Concello e “combater a rutina e a soidade” dos nosos veciños, segundo explicou a edil responsable de Benestar Social. Este tipo de pasatempos, puntualizou, “son beneficiosos para o seu estado de benestar ao tempo que exercitan a súa memoria, atención e concentración”. Entre as actividades que se desenvolven de forma habitual nos comedores sénior está o bingo social, que ten como obxectivo xerar beneficios para a saúde física, mental e afectiva dos maiores; a celebración de festividades, con elaboración de menús especiais para os días de Reis, entroidos, aniversarios, as Pepitas ou o Día Internacional do Maior; e as charlas sobre diabetes a cargo da Asociación de Diabéticos de Ferrolterra.
Éxito da campaña de promoción
A concellería iniciou no mes de novembro unha campaña de promoción dos comedores sénior, catro dos cales —a excepción do de Río Xubia — contan con vacantes. En total dispoñen de 100 prazas, 20 cada un deles, e a campaña busca darlle máis visibilidade a este servicio municipal así optimizar os recursos dos que dispón o Concello. Un mes despois da posta en marcha da campaña, que inclúe o reparto de tarxetas e a colocación de carteis explicativos en edificios públicos e centros de saúde, a edil valora “positivamente” a iniciativa, xa que “rexistramos máis de vinte solicitudes”, a maioría para o comedor sénior de Esteiro.
