Galicia Ártabra Digital Noticias de Ferrol y la comarca de Ferrolterra.
A xunta de voceiros dos grupos municipais do Concello de Ferrol, que preside o alcalde, Ángel Mato, acordou esta mañá apoiar aos comités de Navantia Fene-Ferrol na súa recollida de firmas pedindo carga de traballo. O rexedor lembrou que hai dous meses “tivemos unha xuntanza entre máis de 20 alcaldes para chamar a atención sobre a situación industrial na zona” e agora “apoiamos aos sindicatos” nun problema, dixo, “que afecta ás comarcas de Ferrolterra, Eume e Ortegal”.
Os voceiros municipais tamén acordaron sumarse á proposta da Asociación de Empresarios Ferrolterra (AEF), que solicita que o trazado do Corredor Atlántico Ferroviario en Galicia chegue de forma directa aos portos de A Coruña e Ferrol. Deste modo o percorrido quedaría en forma de Y coas conexións Monforte-Vigo e Monforte- Ferrol-A Coruña.
Por último, os voceiros resolveron fixar para o próximo 19 de decembro, ás 19 horas, a celebración dun pleno extraordinario co que se dará continuidade ao do mes de novembro, que rematou sen poder abordar todos os puntos da orde do día.
