O BNG non entrará no goberno de Ferrol

Ao longo destes últimos días desde o BNG mantivéronse conversas co PSOE co obxecto de avaliar a posibilidade de formar parte do próximo goberno local.

As respostas obtidas a día de hoxe por parte do PSOE aos problemas propostos polo BNG, tanto no debate de investidura como nas conversacións anteriores e posteriores, impiden que o BNG poida integrarse no próximo goberno local, sinalan dende a organización nacionalista.

O BNG non pode formar parte dun goberno local «que pretende obrigarlle a pagar aos veciños e veciñas os cinco millóns de euros que van desde 2015 até marzo de 2017 pola xestión dunha depuradora que non é nosa e que non depuraba«.

Que pretende que a recollida do lixo, «o contrato máis caro da cidade«, «continúe a ser o coto privado de transnacionais ou que ten no modelo especulativo da burbulla inmobiliaria o paradigma de desenvolvemento urbano a implementar na cidade, tal e como acontece co Plan para o Sánchez Aguilera e o convenio con Defensa«.

Tampouco poden asumir dende o BNG que se deixe pasar a «única oportunidade que temos neste mes de agosto de iniciar o camiño para a creación dunha empresa pública de transporte para mellorar a tan precarizada situación actual do servizo ou que o proceso de peonalización do barrio de A Magdalena se deixe nun segundo plano«.

Desde o BNG estarían en disposición de aceptar posicionamentos opostos aos seus criterios se con iso se fora capaz de levar adiante algunha alternativa para a cidade «que puidésesmo compartir pero o resultado das conversacións mantidas déixanos pouco ou case nulo marxe de manobra«.