O Campionato Galego de verán de natación artística de base terá lugar o sábado en Caranza

Hoxe se presentou no Concello de Ferrol en rolda de prensa o Campionato Galego de verán de natación artística de base, coa presenza do concelleiro de Deportes, Suso Basterrechea, acompañado pola directiva e corpo técnico do club Sincro Ferrol.

Vaise disputar este sábado, 1 de xuño, na piscina do Complexo Deportivo Javier Gómez Noya de Caranza en horario de tarde.

Participan 11 clubs de toda Galicia, arredor de 250 nadadoras de entre 6 e 12 anos. En equipos, na categoría individual e dúos.

Categorías de base I, base II e base III. O total de rutinas son 39, 25 rutinas de equipo, 7 sós e 7 dúos. As portas da piscina están aberta para todo o público que queira presenciar este espectáculo.