Marcos Ruiz, cuarto da xeral e gañador sub-23 en Nigrán polo Triatlón Ferrol

O Triatlón Ferrol sumou dúas medallas no Desafío Illas Estelas de Nigrán co ouro e a prata sub-23 de Marcos Ruiz e Pablo Pedrosa.

O fenés Marcos Ruiz volvía competir despois de semanas lesionado que o limitaban en bici e na carreira. O seu bo adestramento en natación notouse ao saír da praia de Panxón entre os tres primeiros.

Rodou no pelotón perseguidor de bici ata chegar á segunda transición e aí xogarse nos 5 km finais a pé os postos de honra. Finalmente o canteirán da Escola Javi Gómez Noya finalizou en cuarto lugar, coas medallas lonxe pero co billete conseguido para o campionato galego de tríatlon que en agosto se celebrará en Ferrol.

Faltáronlle 20 segundos a Pablo Pedrosa para conseguir a praza para o campionato galego ao rematar nunha meritoria 19ª posición, polo que é probable que consiga en próximos clasificatorios.

Co tempo de Borja Catrufo -61º-, o Triatlón Ferrol colocouse oitavo na clasificación por clubs.