O BNG presentou un recurso de reposición contra o acordo da tasa de depuración

O Bloque Nacionalista Galego de Ferrol presentou un recurso de reposición contra o acordo de declarar finalizada a suspensión da aplicación da taxa de depuración de augas residuais aprobada polo goberno local co apoio do Partido Popular por entender que as causas que motivaron, no seu día, a suspensión desta ordenanza fiscal seguen plenamente vixentes.

O BNG considera que esta decisión, agora recurrida polo grupo municipal, «é froito dun acordo político previo existente entre o Goberno Local e o Partido Popular que posibilitou o levantamento da suspensión da taxa de saneamento imposta no seu día polo goberno de Rey Varela. Un acordo que supón un despropósito de tal calibre que nin o PP é capaz de asumir nin de defender o levantamento da súa propia taxa daí que teña que recurrir ao teatro de solicitar informes externos para tentar xustificar o seu posicionamento e para envolver un pacto político entre Ferrol en Común e o Partido Popular que só beneficia a parte privada de Emafesa».

Para o BNG as tres causas que os técnicos municipais citaron para argumentar à proposta de suspensión da taxa están plenamente vixentes: por un lado pese a existir depuración esta ten eivas, os custos reflectidos na taxa e que provocaron que a relación de custos-ingresos diferiran da realidade segue existindo pois é unha taxa, baseada en estimacións e que non se axusta à realidade, e por último que os máis de 2.500 recursos presentados contra as liquidacións derivadas desta ordenanza seguen sen resolverse.

O BNG considera que activar esta ordenanza fiscal significa «asumir a extorsión á que se está sometendo aos veciños e veciñas desta cidade permanentemente, xa que ningunha das cuestións que teñen que ver co saneamento desta cidade é aceptable. A imposición dunha rede unitaria que contradi a lexislación existente sobre a materia ou que se lle entregue a transnacionais a xestión do servizo, a través do socio privado de EMAFESA, SOCAMEX, ou a través de VIAQUA sen que o concello teña ningún contrato nin encomenda de xestión con esas empresas faise porque o obxectivo destas decisións é beneficiar ás empresas privadas, a transnacionais como VIAQUA ou SOCAMEX».

Para o BNG «é dun cinismo absoluto que o Partido Popular se rasgue as vestiduras pola resposta do Consello Consultivo á pregunta inútil pactada polo PP e FeC para crear unha cortina de fume respecto da aprobación da taxa de depuración do anterior goberno do PP».