O BNG de Narón celebra os avances no centro de saúde, un servizo fundamental para a veciñanza do concello

O Bloque Nacionalista Galego de Narón considera que a presentación do proxecto do futuro centro de saúde de Narón é unha “gran noticia para o concello” ao ofrecer á veciñanza do municipio un servizo máis acaído á realidade social e demográfica do concello nas dúas últimas décadas.

“É un proxecto que quería desde hai moito tempo a inmensa maioría da cidadanía de Narón”, sinala o Consello Local da organización nun comunicado, “e por iso temos que parabenizarnos de que avance até converterse nunha realidade”.

A organización nacionalista lembra que este non era o modelo que quería inicialmente o BNG, que avogaba por dous centros -o actual e mais outro de menor tamaño ca o presentado hoxe noutra das zonas urbanas do municipio-, mais esa proposta foi finalmente derrotada pola maioría do pleno en 2008 e, polo tanto, “cómpre, como fixemos no seu momento, aceptar que ese era o proxecto que quería a maioría da veciñanza de Narón e así o demostramos cunha recollida de sinaturas urxindo a acelerar o proceso”.

O BNG considera que os avances na construción do centro de saúde son un exemplo máis de que a colaboración entre administracións é clave para botar a andar proxectos de envergadura para os concellos e animou a que ese traballo conxunto se prolongue nos vindeiros meses para evitar que se incumpran os prazos de licitación e execución da nova infraestrutura.