O BNG oponse a proposta do PP de rebaixar o IBI

O Bloque Nacionalista Galego de Ferrol sinala nun comunicado que » se opón a proposta do PP de rebaixar o IBI no Concello de Ferrol por ser unha proposta demagóxica e quere denunciar o comportamento cínico do goberno local que no canto de evitar que esta proposta se leve adiante, no canto de traballar por unha fiscalidade progresiva na cidade, por revertir a fiscalidade abusiva imposta polo PP no anterior mandato e traballar para que aquelas institucións e adminsitracións que non pagan o IBI empecen a facelo, permite que se poida aprobar unha proposta que non vai beneficiar aos que menos teñen.

Compensar o catastrazo

BNG considera «un absoluto despropósito e un comportamento hipocrita que o goberno municipal, que di que esta en contra desta medida xénerica proposta polo PP, permite que se introduza como un punto da orde do día do pleno ordinario, permitindo que o PP e o PSOE poidan aprobala». O BNG cre que «é absolutamente demagóxico que o PP despois de obrigar aos veciños e veciñas de Ferrol a ter que asumir un «catastrazo» aplicado con carácter retroactivo pretenda compensar a aprobación dese «catastrazo» cunha rebaixa xenérica do IBI que non ten en conta nin a renda dos propietarios e propietarias, nin o valor patrimonial das edificacións sobre as que se aplica o imposto nin as actividades que desenvolven. Indicar asi mesmo que pese a que se aprobou unha mocion que evitaba a aplicación do carácter retroactivo do catastrazo na cidade esta medida non chegou a efectivizarse».

As edificacións de Defensa

«A proposta do PP faise nunha cidade como Ferrol na que existen Institucións, empresas públicas, grandes edificacións e inmobes que estan exentos e que non pagan o IBI. Referimonos as edificacións do Ministerio de Defensa que ocupa o 20% de solo urbano e que non paga un só euro por elas, ou edificacións vinculadas ao Ministerio do Interior. Ademais das vinculadas a estes Ministerios, temos entidades ás que deberian cobrarselles este imposto, as propiedades desafetadas de Defensa que teñen a obriga legal de pagar, propiedades da igrexa que non estan afectas ao culto ou propiedades da Xunta de Galiza como o anuncio que se ten feito por parte da mesma, que parece que o goberno local acepta, como é que o centro hospitalario de Ferrol estea eximido do pago do IBI.

«Desde o BNG consideramos que non se debe facer un debate falso sobre unha rebaixa fiscal xenérica que obviamente non é progresiva senón mais ben regresiva. Lembrar que nesta cidade existe unha carencia estructrural de ingresos dos que comparativamente con outras cidades similares a esta, como Pontevedra, limita moito a actividade economica, de xestion e de prestación de servizos por parte desta administración local. Nun contexto tan complexo e deficitario como este pola carencia de ingresos nunha cidade como Ferrol, que se faga un debate sobre a política fiscal dunha maneira tan demagoxica, falsa e co único obxectivo de lavarlle a cara ao anterior goberno do Partido Popular que impuxo unha política fiscal baseada no incremento de todas as ordenanzas fiscais existentes e sobre todos os servizos deste concello para o BNG é inadmisíbel.?» remata o comunicado.