“Ilusións ópticas” este domingo no parque da Frouxeira co Mago Romarís

O programa “Escenarios Paralelos” regresa este domingo ó parque da praia da Frouxeira cunha novidosa proposta de maxia, “Ilusións Ópticas”, a cargo do Mago Romarís. Dirixido ó público familiar, desenvolverase entre as 16,30 e as 20,30 horas con entrada de balde. E, en caso de choiva, o espectáculo trasladaríase á Casa da Cultura. Hologramas, anamorfosis, paradoxas… porán a proba o inxenio de cada participante, xa que se por algo se caracteriza o Mago Romarís é por interactuar co público. Invitarao a coñecer e descubrir o porque e o como das súas fabulosas e fascinantes Ilusións Ópticas. E, sobre todo, o público sentirase protagonista nestas experiencias nas que se porá a proba o seu sentido visual.

Co programa “Escenarios Paralelos”, o Concello de Valdoviño busca sacar á rúa as súas propostas culturais e, especialmente, dar a coñecer emprazamentos únicos do municipio. Así mesmo, conta coa colaboración da Deputación a través da Rede Cultural.