Galicia Ártabra Digital Noticias de Ferrol y la comarca de Ferrolterra.
A concelleira de Estatística, Mar Gómez, recordou á veciñanza do Val que as pegatinas que se facilitaron coa nova numeración das vivendas non se deben colocar ata o momento no que os propietarios dos inmobles reciban unha notificación coa inscrición padroal actualizada. A edil naronesa incidiu en que o enderezo que se lles notificou hai unhas semanas é provisional e, polo momento, está suxeito a posibles cambios, tal e como se lles indicou a través dunha carta remitida desde o Concello.
Unha vez que se notifique á veciñanza -tamén a través dunha carta- a inscrición padroal actualizada, poderanse colocar as pegatinas e tamén dar conta dos cambios aos distintos organismos e empresas subministradoras de diferentes servizos, tal e como explicou Gómez. “No caso de que as veciñas e veciños coloquen xa as novas numeracións nas súas vivendas pode ocasionar, polo momento, problemas en determinados servizos, ao non estar actualizada a inscrición padroal”, recalcou a concelleira de Estadística.
A edil naronesa valorou unha vez máis a colaboración prestada polas veciñas e os veciños do Val durante o proceso levado a cabo para renumerar as vivendas e rotular os camiños localizados na citada parroquia.
