“Escenarios Paralelos” regresa a Valdoviño este domingo

O Concello de Valdoviño reedita este ano o programa cultural “Escenarios Paralelos”. Un proxecto que, segundo explica a concelleira de Cultura, Rosana García, busca descentralizar as actividades culturais cara as diferentes parroquias do municipio, dar a coñecer o patrimonio cultural e natural a veciños e visitantes e poñelo en valor. Inaugurarase este domingo, 2 de xullo, e terá como “escenario paralelo” o atrio da Capela das Neves, en Aviño –parroquia de Valdoviño-. Alí, e a partir das 19,30 horas, a artista Marian Ledesma ofrecerá un recital que percorrerá os contos clásicos a través da música. Cancións con mensaxe. Un espectáculo para todos os públicos incluído na Rede Cultural da Deputación provincial.

“Escenarios Paralelos” continuará o domingo 9 no parque da praia da Frouxeira, co espectáculo “O que queda por chover”, a cargo da compañía Duelirium, e o domingo 16, e no mesmo espazo, a banda de música de Visantoña-Odaiko ofrecerá un recital, namentras que o domingo 23, será o turno do teatro. Na Frouxeira representarase a obra “En punto”, a cargo do grupo “Teatro en Punto”. O venres 28, o Concello propón unha andada nocturna baixo o lema “Lavandeiras: igrexa de Vilarrube-Lavadoiro dos Romeus (Vilaboa)”, con espectáculo incluído neste último espazo. Para participar, é preciso inscrición previa na Casa da Cultura. E, pechando o programa, espectáculo de monicreques a cargo de Seisdedos Marionetas Tradicionais. Ofrecerán “O galo Quirico e os seus amigos” no parque de Marnela (Pantín).

O Concello invita á veciñanza a tomar parte nun programa que, durante a primeira edición, permitiu descubrir “Escenarios Paralelos” como o Faro de Punta Frouxeira –a través dun encontro literario e unha quedada para pintar-; a Capela da Fame –cunha obra de teatro-; a antiga igrexa e camposanto de Loira –coa celebración do Samaín-, ou a igrexa de Vilarrube –cun recital-.