Galicia Ártabra Digital Noticias de Ferrol y la comarca de Ferrolterra.
Teatro da Semente traerá este domingo a Valdoviño a súa obra “Viaxe a Dadá”, un proxecto para bebés de 0 a 3 anos e acompañantes con xogos iniciáticos, cancións de berce, estimulación sensorial e moito cariño. Terá lugar no auditorio da Casa da Cultura, a partir das 18,30 horas e entrada de balde ata completar aforo.
O pase forma parte da programación de actividades socioeducativas para esta primavera-verán que promove a Concellería de Servizos Sociais e inclúese na Rede Cultural da Deputación provincial da Coruña.
Sobre a temática do espectáculo, Dadá é a infancia, simbolizada nun cabaliño de madeira. É sementar para recoller, sementar para que medren as flores, sementar para (re)coñecer a vida e descubrir o mundo. O proxecto propón entrar no faiado da infancia, subirse a Dadá, o noso cabaliño de madeira, e viaxar pola lembranzas da nenez entre xogos e cantigas.
