Galicia Ártabra Digital Noticias de Ferrol y la comarca de Ferrolterra.
O senador pola provincia da Coruña, Ángel Mato, e o parlamentario José Manuel Pérez, reuníronse co goberno municipal de Valdoviño para tratar diferentes temas de interese para o concello relativas ó Goberno central e a Xunta de Galicia. Na xuntanza, na que estivo presente o alcalde, Alberto González, tratáronse eidos diversos como Medio Ambiente, Defensa ou Transportes.
Nesta reunión tratouse a situación actual de distintos espazos pertencentes ao Ministerio de Defensa, pero que actualmente están desafectados, como o observatorio de Campelo e a estación na Carreira. Estes espazos, segundo explicou Alberto González, poderían ter interese como espazos dotacionais para o Concello de Valdoviño. O senador asegurou que exporía esta situación ao Secretario de Estado de Defensa.
En relación co Ministerio de Medio Ambiente, Alberto González trasladoulle ó senador a necesidade de poder dotar aos areais da praia de Valdoviño de infraestruturas mínimas que axuden a preservar o litoral, pero tamén que de forma temporal se podan instalar servizos de hostaleira básicos para que no verán se poda promover a atracción turística. “Estas actuacións”, remarcou Ángel Mato, “estarán sempre supeditadas á preservación do litoral, xa que é un dos principais patrimonios do concello”. Ademais, o alcalde remarcou a importancia de buscar vías de financiación a través deste ministerio para poder dotar de subministro de auga potable a catro parroquias de Valdoviño.
Na mesma reunión tratouse a necesidade de mellorar o Plan de Transporte, algo “imprescindible para garantir servizos públicos de calidade” á poboación. José Manuel Pérez, parlamentario socialista, comprometeuse a presentar unha iniciativa neste sentido.
