Galicia Ártabra Digital Noticias de Ferrol y la comarca de Ferrolterra.
O Bloque Nacionalista Galego de Narón vén de impulsar a creación dunha comisión organizadora dos actos do centenario da Revolta de Sedes de 1918 –coñecida tamén como Revolta das Pedradas– que terá como punto de partida unha xuntanza o vindeiro domingo, 12 de marzo, ás 11.30 horas, no local social da parroquia.
O BNG de Narón, que hai unhas semanas organizou unha charla sobre uns acontecementos que remataron co asasinato de sete persoas en Narón e outras dúas en Ferrol, considera que, como parte da nosa memoria histórica, cómpre recuperar este tráxico capítulo e homenaxear as vítimas como merecen. Mais ese labor ten que ser, creen, unha tarefa colectiva de toda a sociedade. Por este motivo deciden crear esta comisión, aberta a colectivos e particulares, para a preparación dos actos conmemorativos do centenario, en marzo do vindeiro ano, e para a difusión do seu estudo e coñecemento.
Ao remate da reunión realizáse unha ofrenda floral na zona da Feira do Trece ás 13:00 horas na memoria das Mártires de Sedes.
