Galicia Ártabra Digital Noticias de Ferrol y la comarca de Ferrolterra.
O Bloque Nacionalista Galego de Narón vén de pedirlle á Xunta de Galiza a execución de obras de humanización do treito da Estrada de Castela que atravesa o municipio e o seu posterior traspaso a mans municipais. O Consello Local da organización nacionalista rexistrou unha batería de emendas aos Orzamentos da Xunta que inclúe esta actuación integral no que é o principal eixo vertebrador do concello.
Non foi esta a única emenda presentada pola formación nacionalista para Narón e que recolle algunha das propostas do BNG nos últimos tempos. Así, o documento inclúe tamén partidas –en concreto 3 millóns de euros- para a construción dun novo centro de ensino primario e secundario na zona urbana (que oferten todos os servizos necesarios para favorecer a conciliación familiar), tendo en conta o incremento de poboación nova rexistrada nas dúas últimas décadas no Concello e na insuficiencia da oferta, que, como se sabe, ten levado a que perto de 500 menores do municipio estean matriculados en centros de concellos limítrofes.
O BNG tamén demanda o esforzo económico da Consellería de Sanidade na construción do novo centro de saúde do Concello. O convenio coa Xerencia do Sergas asinouse o ano pasado e, como nos exercicios anteriores, o Concello ten reservada unha partida de 500.000 euros para a súa construción, ademais de ter posto xa a disposición da administración autonómica os terreos nos que se vai erguer o novo equipamento. Neste caso, a formación nacionalista reclama á Xunta o engádego dunha partida específica de dous millóns de euros para a posta en marcha do proxecto.
O saneamento é outro dos puntos para os que o BNG reclama unha partida económica. Así, as emendas presentadas pola organización nacionalista ao Goberno galego contemplan financiamento para actuacións no rural (un millón de euros) e noutras zonas limítrofes, en consonancia coa moción presentada no pleno ordinario de xaneiro e aprobada malia os votos en contra do Partido Popular.
