Galicia Ártabra Digital Noticias de Ferrol y la comarca de Ferrolterra.
Os portavoces municipais do Bloque Nacionalista Galego en Narón, Neda, San Sadurniño e Valdoviño presentarán estes días nos seus respectivos Concellos unha moción para o seu debate no pleno na que reclaman a participación do organismo público Augas de Galiza no saneamento das zonas limítrofes dos diferentes municipios e na que instan aos gobernos locais a manter unha xuntanza na que perfilar os diferentes proxectos. A moción foi presentada na mañá deste luns polos portavoces do BNG en Narón, Pablo Villamar, e Valdoviño, Alberte Ameneiros.
Villamar lembrou que «o saneamento ten que ser unha prioridade para as administracións ao se tratar dun servizo básico para a cidadanía. En moitos casos- engadiu- esas actuacións atópanse nos límites rurais ou periurbanos entre dous concellos, polo que para o seu desenvolvemento cómpre a participación non só das administracións locais competentes, senón tamén o financiamento complementario dun organismo como Augas de Galiza» que, como asegurou Villamar, «xa ten axudado a través de diferentes convenios asinados na segunda metade do ano pasado a un bo número de Concellos galegos, entre os que non nos atopamos ningún dos que conxuntamente asinamos esta moción».
Ameneiros, pola súa banda, reclamou máis transparencia a Augas de Galiza á hora de conceder fondos, «pois polo que sabemos non se estabeleceron uns criterios obxectivos á hora de valorar e achegar eses fondos». O voceiro nacionalista no Concello de Valdoviño sinalou que existen zonas limítrofes nas que a rede de saneamento non está completa e que darían servizo a «decenas de veciños e veciñas» que agora non o teñen.
