O Concello de Cabanas abre o prazo para participar nun curso de Produtos Fitosanitarios

O Concello de Cabanas vén de abrir o prazo de inscrición no Curso de Usuarios Profesionais de Produtos Fitosanitarios, nivel básico. Deste xeito, as persoas interesadas en tomar parte nesta acción formativa que facilita a obtención do carné básico poden cubrir a solicitude e entregala no Rexistro Xeral do Concello. O prazo remata o 3 de novembro, inclusive. Así mesmo, dende a Administración local infórmase que na concesión das prazas terán preferencia os titulares de explotacións agrarias e persoal dependente, así como aqueles que quedaron en lista de espera na edición anterior da acción formativa celebrada no mes de xullo.

A listaxe de admitidos e tamén a relación de persoas en lista de espera, se a houbera, publicarase tanto na páxina web municipal (www.cabanas.es) como no taboleiro de anuncios.

O curso é de 25 horas e estará impartido por persoal da Consellería de Medio Rural. Desenvolverase entre o 7 e o 11 de novembro, en horario de 9 a 14 horas.