Galicia Ártabra Digital Noticias de Ferrol y la comarca de Ferrolterra.
O alcalde de Narón, José Manuel Blanco, prevé que o novo Plan Xeral de Ordenación Municipal (PXOM) de Narón se aprobe definitivamente a finais do ano 2018. No pleno celebrado onte saíu adiante un reaxuste das anualidades destinadas á redacción do documento, no que figuran uns prazos orientativos marcados desde a administración autonómica. «A nosa intención é que o Plan Xeral de Ordenación Municipal se aprobe inicialmente a mediados do vindeiro ano, o que nos permitirá, no caso de que non se rexistren incidencias, aprobalo definitivamente a finais do ano 2018», asegurou Blanco.
O rexedor local recalcou que os investimentos previstos desde a Xunta de 45.936 euros no ano 2018; 91.872 no ano 2019 e os restantes 45.936 na anualidade de 2020 son «totalmente orientativos». «No caso de que os traballos pendentes avancen según as previsións do goberno local, desde o Concello solicitarase á Xunta que abone as cantidades asignadas antes do tempo marcado no cronograma, e non hai ningún problema para seguir axilizando os trámites e adiantando os pagos a medida que avancemos», explicou Blanco.
O alcalde naronés recoñece que «os traballos se están desenvolvendo cun pequeno retraso», incidindo en que esa demora responde en certa medida a que «o regulamento que aplica a nova Lei do Solo xa está aprobado, pero aínda non se publicou oficialmente». O que se trata de evitar desde o goberno local de Narón é, indicou o alcalde, que se repita o acontecido no ano 2002. «O Plan Xeral actualmente en vigor en Narón aprobouse no ano 2002, no mes de abril, e xusto en decembro dese mesmo ano a Xunta aplicou cambios na Lei do Solo, o que fixo que boa parte do traballo realizado durante varios anos no Concello para redactar o PXOM non servise para o documento final». Á vista da situación actual o alcalde asegurou que «en Narón non teremos que chegar ao ano 2020 para contar cun novo Plan Xeral de Ordenación Municipal».
