O BNG considera inasumibel a situación dos servizos ferroviarios en Ferrol

O Bloque Nacionalista Galego de Ferrol considera inasumíbel a situación dos servizos ferroviarios na nosa cidade e o silencio que sobre o mesmo mantén tanto o goberno local como a Xunta de Galiza e destaca que o incendio do ferrocarril producido este venres é froito do abandono ao que se condenou este servizo na nosa cidade.

O BNG sinala que o incendio de onte, únese a outro tipo d situación que se veñen repetindo nos últimos meses e anos como usuarios e usuarias que se atopan sen servizo, por que non funcionan as maquinas, por que non se teñen medios para reparalas, usuarios que cando o seu ferrocarril chega con retraso à estación non poden sair da mesma por que se atopa pechada, convoios que circulan sen revisor, ou se dispoñen limitacións de velocidade nos traxectos pola falla de mantemento das vías, sitiacións que forman parte do día a día dos servizos ferroviarios na nosa cidade e que demostran a desídia na xestión deste servizo.

O BNG considera imprescindíbel que se acometan as melloras necesarias para rematar con estas situacións que impiden que os ferrocarrís poidan circular así como cos continuos atrasos que se veñen producindo nos servizos de Feve na Galiza, con grave prexuízo para as viaxeiras, que se acometan traballos urxentes de conservación e mellora da infraestrutura, en especial a consolidación de trincheiras, limpeza de vexetación e renovación de travesas, vías e balastro e se proceda a revisión e mantemento adecuados do material rodante dispoñíbel, así como a oportuna renovación.

O BNG sinala que para conseguirmos un servizo ferroviario digno para Ferrol e para o noso país cumpre actuar decididamente e considera que o problema da situación do ferrocarril non se resolve unicamente pedindo unha entrevista co Ministerio de Fomento ou con declaración públicas e esixe ao goberno local que se preocupe por manter viva unha via de comunicación como é o transporte ferroviario en vez de querer convertila nunha reliquia para expor nun museo.

Así mesmo desde O BNG censuran que non se queira demandar do Estado as transferencias en materia de ferrocarril interior, xunto cun financiamento axeitado, co obxectivo de crear unha compañía pública ferroviaria galega que mellore a prestación deste servizo no noso país e permita acometer as infraestruturas e desenvolver os servizos de transporte ferroviario na Galiza que contribúan a vertebración económica, social e territorial do país.