BNG de Narón propón que se estude a construción dun paso peonil na contorna de Vilacornelle

O portavoz do grupo municipal do Bloque Nacionalista Galego de Narón, Pablo Villamar, solicitará a realización dun estudo de viabilidade para a construción dun paso peonil na zona de Vilacornelle que mellore a seguridade viaria nesa contorna.

Villamar lembrou que a Xunta de Galiza, a través da Axencia Galega de Infraestruturas, ten até o vindeiro 5 de setembro a exposición pública o proxecto de construción dunha senda ciclista e peonil na estrada AC-116 (Catabois-Valdoviño) na marxe dereita en dirección Valdoviño, é dicir, no carril contrario ao espazo no que se concentra un bo número de equipamentos: centro de saúde, escola, centro de maiores, cooperativa do Val, polideportivo e centro da Nosa Señora de Chamorro, entre outros. «Cremos que sería importante- manifestou Villamar- que se habilite un paso de peóns nesa zona que absorbe non só moito tráfico rodado, senón tamén un elevado tránsito de persoas que fan uso desas instalacións».

Villamar asegurou tamén que a intervención na estrada de Valdoviño «nos parece unha obra interesante precisamente porque vai contribuír a mellorar a seguridade viaria en todo o seu percorrido» e insistiu en que a construción dun paso de peóns redundaría no beneficio de toda a veciñanza. «Este paso, loxicamente, ten que estar adaptado ás características dunha estrada interurbana coma esta, con todas as medidas de seguridade necesarias para que cumpra o seu cometido», engadiu.

Destacou, asimesmo, que a senda ciclista e peonil é unha obra de interese xeral e que o grupo de goberno ten feito as xestións oportunas para que, aproveitando esta actuación, se faga unha preinstalación das redes de saneamento e abastecemento naqueles puntos da estrada que non contan con estes servizos.

Nesa mesma liña, o BNG instou á Xunta a que amañe a estrada de Baltar para a súa posterior cesión ao Concello, acordo sobre o que, lembrou, existe un compromiso verbal por parte dos responsábeis do departamento autonómico. Ademais, subliñou, en consonancia con esta actuación o Concello vai habilitar outra senda peonil que conecte a estrada xeral coas instalacións deportivas de Sinde.

Por outra parte, o portavoz do BNG de Narón sinalou que a obra que vai executar a Xunta trae aparelladas unha serie de afectacións en propiedades particulares que, dixo, «agardamos que se teñan en conta á hora de fixar as compensacións» e que as persoas que teñen alí propiedades sexan «afectadas e non prexudicadas».