Galicia Ártabra Digital Noticias de Ferrol y la comarca de Ferrolterra.
A ludoteca de verán que organiza a Concellería de Servizos Sociais para nenos de catro a doce anos arrancará este luns 27 coa participación de nove rapaces. Unha cifra que chegará ata os 30 a partires do 1 de xullo. De feito, o Concello recibiu ata 35 solicitudes para as 30 prazas ofertadas, co que se elaborou lista de espera. As sesións terán lugar no apeadoiro e praia da Madalena, entre as 9 e as 14:30 horas, e entre as propostas destacan os xogos populares e alternativos; teatro con iniciación a técnicas de expresión corporal e dramatización, contacontos, ritmo, baile, obradoiros de manualidades e aula de natureza e reciclaxe para traballar a psicomotricidade e a creatividade, así como o respecto polo medio.
Así mesmo, continúa aberta a inscrición no Campamento Deportivo, para rapaces nados no ano 2009 e anteriores e data de inicio o 1 de xullo, e no Campamento Xuvenil, para mozos de entre 13 e 17 anos, que comezará o 11 de xullo. No primeiro caso, ofreceranse actividades como xogos acuáticos, baloncesto, bádminton, voleibol, hockey, béisbol ou fútbol. No segundo, levaranse a cabo obradoiros de artesanía e pulseiras; talleres de trenzas de coiro e tatuaxes de henna; construción de malabares ou actividades deportivas como tiro con arco, voleibol, actividades acuáticas, montaxe de tendas ou supervivencia.
Para anotarse, os interesados deben facelo na casa consistorial.
