Galicia Ártabra Digital Noticias de Ferrol y la comarca de Ferrolterra.
O número un do BNG na provincia da Coruña para as eleccións xerais, Carlos Callón, solicitou «un tren do século XXI, non un tren chuchú» , que una Ferrol e A Coruña.
Callón, acompañado pola portavoz nacional, Ana Pontón, realizou na mañá deste venres en Ferrol o seu primeiro acto de campaña tras a pegada de carteis da pasada medianoite, na que reivindicou «unhas infraestruturas para Galicia nas mesmas condicións que as do resto do Estado» .
Así mesmo, o nacionalista tachou de «auténtica vergoña» que sexa «máis rápido ir entre Ferrol e A Coruña en bicicleta que ir nos servizos de tren que hai neste momento», motivo polo que considera que as forzas estatais teñen «amnesia selectiva» .
«Acórdanse de Galiza soamente cando tocan as campañas electorais, pero despois esquécense completamente cando toca acción de goberno» , mencionou, e agregou que «un deputado do BNG rende máis para Galiza que os 23 que están ás ordes de Rajoy, Sánchez, Rivera e Igrexas» .
Ademais, subliñou que, «ben fosen os gobernos de esquerda ou os de dereitas, había algo que sempre se lles esquecía: Galiza» , polo que resolveu que «se o BNG está, Galiza está» .
Pola súa banda, a portavoz nacional da formación, Ana Pontón, tachou hoxe de «irrisorio» que Feijóo díxolle aos galegos que está encabuxado co que pasou estes cinco meses» e que «o futuro é Rajoy» .
«O que non sei é se o presidente da Xunta está a preparar a súa carreira para o club da comedia» , manifestou.
Con respecto ao tema reivindicado este venres, Pontón argumentou que «o que fixeron Feijóo e Rajoy foi facer un deseño no que se excluía do eixo atlántico a Ferrol e que deixou incomunicada á comarca» , pois, engadiu, «a Xunta é incapaz de defender os intereses de Galiza por encima dos seus intereses partidistas» .
«É un símbolo de como se trata a Galicia desde Madrid. Galicia debe ter os mesmo servizos que o resto do Estado. Non somos cidadáns de segunda e por tanto, para nós é unha cuestión fundamental» , concluíu.
