O Padroado da Cultura e a Sociedade Cultural Areosa celebrarán os Maios en Piñeiros

O Concello de Narón e a Sociedade Cultural Areosa, de Piñeiros, organizaron un ano máis un completo programa de actos para celebrar a festividade dos Maios na localidade, que este ano chega á súa décimo novena edición. A vicepresidenta do Padroado da Cultura e edil da área, Marián Ferreiro, e o presidente de Areosa, Bruno Díaz, presentaron esta mañá a convocatoria, que inclúe diferentes actividades, algunhas delas iniciadas a principios deste mes en centros escolares e asociacións da localidade, que culminarán esta fin de semana no Centro Cívico Social de Piñeiros.

O sábado día 14, ás 17 horas, concentraranse no adro da igrexa de Piñeiros os Maios que participarán neste evento, entre eles os da entidade veciñal Virxe de Fátima, de Freixeiro; de Areosa; da Asociación Semente de Trasancos; do Obradoiro de Construción de Instrumentos do Padroado da Cultura e da Fundación Terra de Trasancos. A comitiva sairá desde a igrexa ata o Centro Cívico de Piñeiros ás 17:30 horas para dar comezo a recepción dos Maios no pavillón de Piñeiros ás 17:40 horas. A partir das 18 horas, actuarán os grupos do Padroado da Cultura de Narón no exterior do polideportivo; elaborarase no interior das citadas instalacións un mosaico floral no que tradicionalmente participan nenos e nenas da localidade, e tamén terá lugar a Mostra dos Maios elaborados nos últimos días en centros escolares da localidade (que poderá visitarse tamén o domingo día 15, de 11 a 20 horas no polideportivo de Piñeiros).

A edil de Cultura recordou ademais que este venres, día 13, rematará o taller de arte floral iniciado a mediados do pasado mes de abril a instancias do Padroado da Cultura e a asociación Areosa no local social de Piñeiros. Nestas convocatorias, de dúas horas de duración cada sesión, ensinouse aos asistentes a elaborar diferentes tipos de ornamentación empregando varias especies florais.

A programación do Concello con motivo da celebración dos Maios incluíu tamén como en anos anteriores a Unidade Didáctica dos Maios, na que participan un milleiro de alumnos e alumnas de educación Infantil e Primaria de colexios de Narón. Escolares do CPR Ayala, do CRA de Narón, dos CEIP Virxe do Mar, Ponte de Xuvia e A Solaina e do CPI do Feal e o CPR Santiago Apóstol participaron nesta actividade durante as horas lectivas. Os nenos e nenas aprenderon a elaborar Maios, traballos que permanecerán expostos esta fin de semana en Piñeiros. «Trátase dunha actividade didáctica pensada para os escolares do municipio, co obxectivo de que coñezan o que é un Maio e tamén a tradición que teñen este tipo de ornamentacións florais na nosa comunidade», explicou Marián Ferreiro.

A concelleira de Cultura e o presidente de Areosa animaron á veciñanza a acudir esta fin de semana á celebración dos Maios. Ferreiro agradeceu a colaboración dos centros de ensino, asociacións veciñais e particulares que se implican nesta convocatoria, valorando particularmente o traballo de Areosa.

«Este ano a celebración dos Maios alcanza a súa décimo novena edición na localidade, unha data que conmemoraremos un ano máis contando coa implicación da veciñanza de Narón, que contribúe a manter máis viva que nunca esta tradición pensada para exaltar a natureza e coa súa orixe nunha festa característica da época primaveral en Galicia», explicou a edil de Cultura.