O PP de Narón reúnese co conselleiro de Sanidade para impulsar o centro de saúde

O deputado do Grupo Popular, Hipólito Fariñas, en compañía do portavoz do PP no Concello de Narón, Marcos López, solicitaron ao conselleiro de Sanidade, Jesús Vázquez Almuíña, a axilización dos trámites que dean para o inicio do proceso definitivo de construción do novo centro de saúde naronés.

Hipólito Fariñas lembrou ao conselleiro a recente proposición non de lei aprobada no Parlamento a través da que se demanda á Xunta que busque as fórmulas máis adecuadas para a construción dun novo Centro de Saúde no concello de Narón.

Acordo imprescindible

Neste sentido, o conselleiro lembrou que a Xunta xa conta con 100.000 euros nos orzamentos deste ano para iniciar a redacción do proxecto deste centro de saúde, pero reiterou que é imprescindible a sinatura dun acordo entre a Consellería e o Concello de Narón no que se recollan os compromisos a cumprir por parte das dúas administracións.

Fariñas salientou a total disposición amosada polo conselleiro de Sanidade para levar adiante este proxecto, ata o punto de que Vázquez Almuíña anunciou que proximamente convocará ao alcalde de Narón para unha xuntanza na que dar o impulso definitivo ao novo centro de saúde.

Pola súa banda, Marcos López amosou a súa satisfacción polo compromiso firme do conselleiro de cara a poñer en marcha unha infraestrutura sanitaria necesaria para cubrir as necesidades de todos os veciños de Narón. Así mesmo, destacou que por fin se clarexe un tema que nunca debeu permanecer tanto tempo parado e en debates estériles.