Galicia Ártabra Digital Noticias de Ferrol y la comarca de Ferrolterra.
O portavoz do Partido Popular de Galicia, Miguel Tellado, asegurou esta mañá que o descenso no paro interanual rexistrado no mes de xaneiro «segue a contradicir a aqueles que suxiren cambiar o Goberno do Partido Popular». Así, o portavoz puxo en valor que o pasado mes se pechase en Galicia con 22.555 persoas desempregadas menos que fai un ano, o que supón unha baixada con respecto a xaneiro de 2015 dun 8,7%.
«As cifras reflicten, unha vez máis, que a xestión e as medidas levadas a cabo polo Goberno do PP orixinaron a creación de emprego que reclamaba a nosa sociedade, tanto en Galicia como en España», dixo o voceiro.
Nese sentido, Tellado sinalou que «non é unha casualidade que a última vez que houbo un xaneiro tan positivo foi hai doce anos e cun presidente do Partido Popular á fronte do Goberno». Segundo o voceiro, a evolución do desemprego pon de manifesto que a estabilidade política que só aporta o PP deu resultados, «logrando ser a gran aliada da creación de emprego».
Tellado aclarou tamén que, pese a que o desemprego medra un 3,3% con respecto a decembro en Galicia, «esta é unha subida habitual provocada polo remate da campaña de Nadal». Ademais, salientou que «de novo a nosa comunidade segue a presentar un comportamento mellor que o conxunto do Estado en termos interanuais».
Deste xeito, o portavoz do PPdeG afirmou que «se sumamos esta baixada interanual aos bos resultados da EPA coñecidos a pasada semana, que situaban a nosa taxa de paro 3,2 puntos por debaixo de España, o resultado é unha tendencia positiva no camiño de consolidar a recuperación económica», destacou.
«É certo que non nos daremos por satisfeitos mentres queden moitos postos de traballo por recuperar pero tamén debemos valorar os 27 meses de descenso consecutivo interanual rexistrados en Galicia, que nos colocan a niveis de paro inferiores aos de xaneiro de 2011, hai cinco anos», engadiu o voceiro.ellado sinala que
