COGAVE apoia as reivindicacións do sector naval de Ferrolterra

COGAVE (Confederación Galega de Asociacións Veciñais, que aglutina a Federacións Veciñais das catro provincias e representa a máis de 400 Asociacións Veciñais de toda Galicia) quere mostrar o seu apoio ás reivindicacións da Federación Veciñal “Roi Xordo” de Ferrol en relación ao sector naval galego.

Todas as propostas presentadas teñen como referencia común a creación e/ou mantemento do emprego xa que está en xogo un sector que xera un número moi importante de postos de traballo, directos e indirectos, o cal leva consigo a supervivencia e o futuro económico e social das comarcas implicadas.

En concreto queremos mostrar a nosa solidariedade co cidade e comarca de Ferrol. Cómpre que o goberno escoite a voz dunha cidade reclamando carga de traballo, a construción do dique flotante e a continuidade dos contratos de Pemex, máis alá de anuncios e polémicas mediáticas.

Ferrolterra necesita solucións. Solucións para unha comarca agonizante con unha taxa de desemprego superior, con moito, á media galega e estatal, unha comarca onde xa a taxa de ocupación é das máis baixas do Estado e que xa , de forma unánime saíu á rúa en manifestacións multitudinarias e folgas xerais comarcais, tamén, practicamente totais.»