Galicia Ártabra Digital Noticias de Ferrol y la comarca de Ferrolterra.
A secretaria xeral dos socialistas de Ferrol, Beatriz Sestayo, informou na mañá deste mércores,día 19, acompañada de membros da executiva local, sobre as diferentes xestións que están a facer dende o seu partido para suplir a “neglixencia, pasividade, indolencia e insensibilidade” de todos e cada un dos Gobernos do PP.
A deputada autonómica anunciou, dunha banda, as iniciativas parlamentarias presentadas por ela mesma na Cámara Galega sobre a suposta consulta a Europa “que volven sacar da chisteira os populares”, para coñecer qué proxecto acompaña a dita consulta e baixo qué tipo de cofinanciamento ou axuda quere acollerse, entre outras cuestións. A este respecto, Sestayo asegurou que a día de hoxe e consultados técnicos europeos sobre a presentación do proxecto do dique con propostas de viabilidade de financiamento que se acollan a algún tipo de axuda europea, éstes informan de que «non lles consta» dita presentación por parte do Goberno de España. Os socialistas lembran que existen fondos de cohesión, estruturais e outros tipos de axudas para zonas prioritarias cos que se podería financiar o dique flotante en Navantia e alertou que Galicia perderá fondos estruturais do 2014 “mentres a Xunta segue tomando o pelo ata a desesperación”, dixo.
Na mesma liña actuará a deputada socialista no Congreso Paloma Rodríguez, como anunciaron na rolda de prensa os representantes do PSdeG-PSOE de Ferrol, tamén dirixirase ao Goberno, neste caso do Estado, para interesarse pola suposta consulta a Europa acerca do dique flotante.
Antolín Sánchez Presedo en Ferrol
E para explicar os temas que se atopan na Unión Europea relativos á comarca e detallar polo miúdo o vencellado co dique flotante e a súa viabilidade e posibilidade de recibir axudas da UE viaxará a Ferrol o vindeiro día 29 o eurodiputado socialista Antolín Sánchez Presedo, tal e como avanzou Beatriz Sestayo.
Estas declaración realizáronas os socialistas no día no que paradoxicamente se cumplen seis anos da adxudicación do último pedido a Navantia por parte de Australia, que se levou a cabo durante o Goberno de Zapatero e significou o maior pedido da historia do estaleiro, cun investimento de 1.185 millóns de euros e 10 millóns de horas de traballo, e tamén se cumplen, neste caso nove meses, do anuncio de Feijóo de construcción dos floteis por parte de Barreras e Navantia. Un anuncio que ata o momento é unicamente unha “tomadura de pelo” máis e un exemplo da “desfachatez” do PP con esta comarca.
Así as cousas, Beatriz Sestayo pediu unha vez máis a dimisión do alcalde, José Manuel Rey Varela, ao que dixo que “estes momentos non son para conmoverse, senón para moverse”.
