O PSOE pide ao alcalde que convoque xunta de voceiros para abordar o pleno pendente

O Grupo Municipal Socialista, a través da súa voceira, Natividad González, pídelle ao alcalde que convoque unha xunta de voceiros, de manera urxente, para abordar o pleno pendente do mes de maio.

Certamente, xa teñen transcorridos case dez días dende a suspensión do pleno ordinario, e ninguén na corporación local coñece que ten previsto facer o alcalde ao respecto.

A voceira socialista, Natividad González, manifestou que é obriga do alcalde garantir o normal funcionamento da institución local, e pídelle que recupere o antes posible a normalidade, e que faga un esforzo para establecer canles de diálogo cos colectivos afectados, de xeito que sexa posible manter un equilibrio entre o dereito de expresión e denuncia da situación, e o normal funcionamento do concello.

Critica que, ata de agora,  non se teña dado ningún paso, nin informado aos membros da corporación sobre as actuacións que ten previsto desenvolver o goberno.

Reclámalle ao alcalde que non deixe para o último día, como xa aconteceu no mes pasado, a toma de decisións e insisten en que estas deben ser consensuadas cos demais grupos da corporación, cuestión que precisa dun tempo razoable para poder  acordar entre todos e todas a mellor solución.

Finalmente, o Grupo Municipal Socialista entende que é perfectamente factible compatibilizar o funcionamento das institucións coas lexítimas demandas e reclamacións do conxunto da cidadanía, todo elo con garantías de seguridade para tódalas persoas, unha cuestión que é unha obriga ineludible da administración local, non so na casa do Concello senón en tódalas dependencias municipais.