Galicia Ártabra Digital Noticias de Ferrol y la comarca de Ferrolterra.
O policía local de Narón Juan Manuel Delgado González recibirá a Medalla ao Mérito da Policía Local concedida pola Vicepresidencia e a Consellería de Presidencia, Administracións Públicas e Xustiza da Xunta de Galicia, como recoñecemento á súa actuación en 2012 na que, poñendo en risco a súa vida, salvou un veciño da localidade que se botou ao río.
Desta forma, recoñéceselle a intervención que realizou o 3 de agosto de 2012. Ese día, un veciño de Narón botouse co seu vehículo ao Río Xuvia, na zona de Presa do Rey. A Policía Local recibira unha chamada do servizo de Emerxencias 112 pola caída do vehículo ao río, nunha zona con bastantes correntes de auga.
Ata o lugar desprazouse unha patrulla con tres axentes. Juan Manuel Delgado González botouse ao río, nunha actuación que supuxo un grave risco para a súa propia vida, logrou abrir a porta do vehículo e rescatar a persoa que estaba no seu interior. Os seus compañeiros axudárono despois a chegar a terra e a reanimalo.
Por esta actuación, Juan Manuel Delgado recibe a Medalla ao Mérito da Policía Local, segundo publica este xoves o Diario Oficial de Galicia (DOG), nunha orde do 22 de maio pola que se determinan as distincións e recompensas que se concederán ao persoal dos corpos de Policía Local durante o ano 2013.
As propostas realizadas pola Dirección Xeral de Emerxencias e Interior, como unidade directiva competente en materia de coordinación, foron avaliadas pola Comisión de Coordinación de Policías Locais de Galicia e sometidas á resolución e ditame da Vicepresidencia e Consellería.
Acto de servizo
Na concesión da Medalla, valórase a Juan Manuel Delgado «a súa intervención nun acto de servizo, ao ser de destacar o seu compromiso de servizo, calidade inherente ao ideal de servizo público, predicable dun bo policía».
Juan Manuel Delgado González recibiu este xoves de mans do alcalde naronés a Medalla de Servizos distinguidos do corpo de Policía Local de Narón. Trátase da primeira vez que o Concello de Narón otorga unha distinción destas características, concedida pola súa actuación digna de destacar e especialmente meritoria no rescate dunha persoa sucedido en agosto de 2012.
O acto tivo lugar no pazo da cultura de Narón e foi presidido polo alcalde a quen acompañaban os membros da corporación municipal.
Pero ademáis de distinguir a actuación do Oficial da Policía Local, o Concello de Narón tamén destacou o comportamento dos axentes da Policía Local Carlos Carral Orjales e Manuel Bello Martínez, que estaban de servizo con él nese momento, e que axudaron no rescate e nas labores de reanimación do accidentado. O Xefe da Policía Local de Narón, Eduardo Pita, e o Concelleiro de Seguridade Cidadá, entregáronlles dúas Mencións Honoríficas pola súa actuación.
A concesión destas distincións foi aprobada por unanimidade pola Corporación Municipal de Narón, na sesión plenaria celebrada o 25 de outubro de 2012.
