Galicia Ártabra Digital Noticias de Ferrol y la comarca de Ferrolterra.
O PSdeG-PSOE de Ferrol fixo público onte, despois da celebración dunha longa reunión ordinaria, o acordo por unanimidade dos asistentes de elaborar un protocolo con medidas concretas e eficaces contra a corrupción e a mala praxis na política, unha cuestión que preocupa fondamente á dirección política do partido. De feito, e dada a relevancia que ten esta cuestión, os socialistas ferroláns adicarán todo este mes á elaboración deste catálogo con medidas concretas encamiñadas a reforzar a transparencia e bloquear a transparencia na vida política.
Para a súa redacción, o Partido Socialista quere contar coas suxestións da cidadanía, para o que, por unha banda, ten previsto celebrar reunións monográficas para abordar polo miudo esta cuestión e, por outra, lémbrase a posibilidade de facer chegar calquera iniciativa ou opinión ao respecto á dirección de correo electrónico do partido: ferrol.psdeg.psoe@gmail.com.
Unha vez rematado este catálogo, o PsdeG-PSOE local ten previsto elevalo á reunión do Comité Nacional do partido, que se desenvolverá o día 2 do vindeiro mes de marzo.
Sector naval
Outro dos asuntos incluidos dentro da orde do día de Executiva Local desta mañá foi a relativa ao sector naval. A este respecto, a dirección política socialista, ao fronte da que está Beatriz Sestayo, esixiu ao presidente da Xunta e ao conselleiro de Industria que teñan a “decencia” de recibir o día 5 -martes- aos traballadores e traballadoras de Navantia para dar as explicacións que todo o sector naval merece despois da negativa definitiva do Partido Popular a construir o dique flotante nos estaleiros ferroláns. A Executiva, coa súa responsable e tamén deputada á cabeza, viaxarán a Santiago para tratar de forzar aos dirixentes da Xunta a manter a reunión solicitada.
Así mesmo, o PSdeG-PSOE local reclama ao alcalde de Ferrol, José Manuel Rey, que deixe de actuar de “neno mimado do Partido Popular” e antes de facer o único que lle queda ante a súa incompetencia e claras mentiras relativas ao naval, que é marcharse á súa casa, esixa ao PP que cese a todos os cargos e responsables de que o dique flotante non se vaia a construir en Ferrol. “Todos e cada un dos dirixentes e altos cargos aos que Rey se refería esta semana nunha premeditada e orquestrada posta en escea e que, polo visto, o teñen moi decepcionado, foron nomeados a dedo polo Consello de Ministros, integrado unicamente por xente do Partido Popular”, lembraron dende a dirección política socialista.
