Galicia Ártabra Noticias de Ferrol y la comarca de Ferrolterra.
A formación nacionalista reivindica a súa experiencia, o seu equipo e un proxecto de futuro para Cabanas.
A asemblea local do BNG de Cabanas decidiu por unanimidade que Iago Varela Martínez sexa o candidato da formación á Alcaldía de Cabanas nas próximas eleccións municipais de maio de 2027.
A decisión supón un novo paso na preparación dun proxecto co que o BNG aspira a liderar o Concello de Cabanas, desde unha perspectiva propositiva e centrada nas necesidades da veciñanza.
O candidato nacionalista salienta que o BNG afronta esta nova etapa desde unha posición singular. “Somos a alternativa ao actual goberno, pero tamén somos equipo de goberno. Sabemos o que significa gobernar Cabanas, temos experiencia, coñecemento do Concello e un equipo preparado para asumir responsabilidades desde o primeiro día”.
“Non queremos construír a nosa proposta unicamente sobre o que outros fan mal. Queremos falar de futuro, de como queremos que sexa Cabanas dentro de dez ou vinte anos e de como podemos aproveitar todo o potencial que ten o noso concello”, sinala Varela.
Neste sentido, o BNG aposta por construír un proxecto que poña no centro os servizos públicos, a vivenda, a mobilidade e o transporte, o desenvolvemento económico, o emprego, o medio ambiente, o turismo responsable, o coidado do territorio e a mellora da calidade de vida, incorporando tamén as novas necesidades que están a xurdir no municipio.
“Cabanas ten recursos, ten xente con ideas, ten capacidade e ten enormes oportunidades. O que precisamos é un goberno que saiba planificar, que teña rumbo e que sexa capaz de transformar esas oportunidades en melloras concretas para a veciñanza”, afirma o candidato.
Varela reivindica tamén o traballo desenvolvido polo BNG durante o mandato 2019-2023, no que formou parte do Goberno municipal e asumiu responsabilidades en áreas como promoción económica e turismo, urbanismo, medio ambiente, participación veciñal, comunicación e innovación tecnolóxica.
“Temos a experiencia de ter gobernado e de ter demostrado que se pode facer política municipal doutra maneira. E temos tamén a experiencia destes últimos anos na oposición, coñecendo de primeira man os problemas que segue tendo Cabanas e defendendo alternativas para resolvelos”, explica.
O BNG entende así que a candidatura de Iago Varela debe ser o punto de partida para construír un equipo amplo, preparado e aberto á sociedade, incorporando persoas con diferentes perfís e experiencias.
“Queremos sumar. Queremos contar con toda esa xente que pensa que Cabanas pode dar máis de si e que quere participar na construción dun Concello mellor. O noso obxectivo é formar un equipo de goberno á altura da Cabanas que queremos”, conclúe Varela.
Sobre Iago Varela
Iago Varela (Cabanas, 1986) desenvolve a súa actividade profesional no eido da comunicación, a estratexia e a xestión de proxectos. Conta tamén con formación en mercadotecnia e publicidade, e lidera iniciativas que conectan a tecnoloxía, o turismo, a cultura e a sociedade.
Moi vinculado á divulgación tecnolóxica, é o director do portal especializado “Mallando no Android”, un espazo de referencia no ecosistema dixital galego. Esta vertente comunicativa compleméntase coa súa recente e exitosa incursión no sector audiovisual. Varela estreouse na dirección co documental histórico “Mulleres da Reconversión”, unha peza que está a cultivar unha gran acollida de público nas súas proxeccións e que demostra a súa capacidade para liderar proxectos narrativos de fondo calado social.
No eido institucional e político, conta cunha extensa traxectoria no servizo público e na administración local, destacando a súa etapa como tenente de alcalde de Cabanas (2019-2023). Esta experiencia dotouno dun profundo coñecemento da xestión municipal, o que lle permite sumar á súa visión estratéxica e executiva do sector privado unha firme vocación de traballo polos servizos públicos.
