Galicia Ártabra Noticias de Ferrol y la comarca de Ferrolterra.
O enfermeiro ferrolán, de 23 anos e secretario de Mocidade da organización, será “o referente de Movemento Sumar Galicia na gran fronte de esquerda que é Ferrol en Común, á que apoiamos”.
A Asemblea Comarcal de Movemento Sumar Galicia Ferrolterra elixiu por unanimidade a Antón García Tenreiro como candidato da organización á Alcaldía de Ferrol de cara ás eleccións municipais de 2027.
Antón García Tenreiro, de 23 anos, será “o referente de Movemento Sumar Galicia na gran fronte de esquerda que é Ferrol en Común, á que apoiamos”. A organización reafirma deste xeito a súa vontade de fortalecer un espazo unitario, amplo e plural, capaz de construír unha alternativa progresista para a cidade e de recuperar o goberno municipal.
Nado e criado en Ferrol, García Tenreiro é enfermeiro e desenvolve a súa actividade profesional no ámbito asistencial, cunha especial dedicación á investigación sobre a saúde das mulleres. Forma parte de Movemento Sumar Galicia desde a súa creación, integra a Coordinadora e a Executiva Nacional e exerce como secretario de Mocidade. “Entendo a política como unha forma de coidar, de defender o que é de todas e todos e de garantir que ninguén quede atrás. Ferrol non é simplemente o lugar onde nacín, senón a cidade na que medrei, que aprendín a coñecer e querer e coa que sempre me sentín profundamente ligado”, sinalou o candidato.
García Tenreiro explicou que dá este paso para contribuír á recuperación da forza, da organización e da ilusión necesarias para transformar Ferrol. “Vivimos tempos convulsos nos que non podemos permitirnos a resignación. Ferrol necesita unha política próxima e valente, con capacidade para imaxinar o futuro, pero tamén coa vontade e as ferramentas necesarias para facelo realidade”, afirmou. “Quero un Ferrol con emprego e quero un Ferrol orgullosa da súa clase traballadora”.
Entre as súas prioridades sitúa a creación de oportunidades para que a mocidade poida permanecer na cidade, a defensa dos servizos públicos, o fortalecemento das políticas de coidados, o acceso a unha vivenda digna e a recuperación económica, social e demográfica de Ferrol. “Quero contribuír a construír un Ferrol no que a xente poida vivir, traballar e desenvolver o seu proxecto de vida con dignidade. Unha cidade que non obrigue a súa mocidade a marchar para atopar un futuro e que recupere o orgullo dunha sociedade que sempre soubo organizarse, defender os seus dereitos e loitar”, destacou.
O candidato defínese como feminista, defensor das liberdades, dos dereitos humanos e dos dereitos LGTBIQA+, e comprometido coa clase traballadora e coas loitas sociais que perseguen unha sociedade máis xusta e igualitaria.
Movemento Sumar Galicia destaca que a elección unánime de García Tenreiro representa unha aposta pola renovación xeracional, o compromiso coa cidade e a unidade da esquerda. A organización traballará dentro de Ferrol en Común para construír colectivamente un proxecto político sólido, aberto á sociedade ferrolá e preparado para ofrecer unha alternativa ao actual goberno municipal.
