Nacho, estudante de FP, compartiu unha xornada de traballo con Óscar en Mugardos, a bordo do ‘Hijos de Demetrio’

 

 

Nacho, veciño de Pontedeume e estudante do Ciclo Superior de Transporte Marítimo e Pesca de Altura, participou este pasado xoves  nun novo embarque do proxecto de cooperación “Relevo Xeracional: O Futuro do Mar”, no territorio do GALP Golfo Ártabro Norte.

 

A primeira hora da mañá embarcou desde o porto de Mugardos a bordo do ‘Hijos de Demetrio’, unha embarcación de artes menores patroneada por Óscar, con quen compartiu unha xornada real de traballo no mar, nesta ocasión vinculada á ameixa.

 

A experiencia permitiulle coñecer de primeira man como é unha saída ao mar e como se desenvolve o traballo a bordo, comprobando tamén o esforzo, a responsabilidade e as esixencias dunha actividade que dificilmente se poden transmitir só desde unha aula.

 

Para Nacho, que este curso comeza o seu segundo ano de formación, o contacto directo con profesionais como Óscar é especialmente importante para coñecer a realidade do sector. Tras o embarque, recomenda a outros mozos e mozas interesados nas profesións do mar que proben unha experiencia deste tipo, aínda que sexa unha soa vez, para ver como se traballa realmente e coñecer desde dentro un oficio ao que poden orientar o seu futuro.

 

Os embarques son unha das accións do proxecto “Relevo Xeracional: O Futuro do Mar”, precisamente porque permiten conectar a formación coa práctica e achegar a mocidade aos profesionais, ás condicións reais de traballo e ás oportunidades laborais que ofrece o sector marítimo-pesqueiro. Ese contacto directo entre formación e realidade profesional é un dos obxectivos do proxecto.

 

“Relevo Xeracional: O Futuro do Mar” está impulsado conxuntamente polos oito Grupos de Acción Local do Sector Pesqueiro (GALP) de Galicia e busca contribuír ao relevo xeracional, achegando as novas xeracións ás profesións do mar e promovendo a Formación Profesional Dual como unha vía de acceso a un emprego cualificado e con futuro.

 

Con este novo embarque, o GALP Golfo Ártabro Norte continúa achegando a mocidade á realidade dun sector no que o coñecemento e a experiencia dos profesionais do mar son fundamentais para formar ás novas xeracións. Porque para saber se o mar pode ser o teu futuro, primeiro hai que ter a oportunidade de coñecelo desde dentro.