Galicia Ártabra Noticias de Ferrol y la comarca de Ferrolterra.
Os tickets para a cea popular poden adquirirse na cantina da Sociedade Cultural e Recreativa A Pombiña.
A conta atrás está en marcha para a III Feira de Exaltación do Porco ao Espeto, que este vindeiro sábado, 22 de agosto, converterá de novo a pista polideportiva de Pedroso en epicentro da gastronomía na comarca. O evento está organizado polo Concello de Narón en colaboración coa Asociación Veciñal A Pombiña, que ultima xa os últimos detalles desta nova edición.
A xornada, pensada para todos os públicos, dará comezo ao mediodía cunha sesión vermú amenizada con música, na que se repartirán petiscos de balde entre as persoas asistentes como aperitivo do que está por vir. Pola tarde, entre as 18:00 e as 22:00 horas, será a quenda dos máis pequenos, cunha festa infantil con inchables que porá o punto lúdico á xornada.
Xa entrada a noite, a partir das 21:00 horas, chegará o momento central da festa coa cea popular, na que o porco ao espeto volverá ser o gran protagonista dun menú que se completa con churrasco, chourizos, patacas, pan, bebida, sobremesa e café. Para animar a sobremesa, o grupo A Xesteira de Narón porá voz e tradición á noite cunha actuación de cantos de taberna, antes de que a festa continúe coa música en directo de Tania, encargada de pechar a velada.
Quen aínda non teña o seu ticket para a cea pode adquirilo na cantina da Sociedade Cultural e Recreativa A Pombiña, a un prezo de 18 euros para as persoas socias, 25 euros para as non socias e 12 euros para os nenos e nenas maiores de 12 anos, sendo de balde para os menores desa idade. A organización lembra que, de quedar tickets dispoñibles, tamén se poderán mercar o propio día da festa, aínda que recomenda non esperar ao último momento dado o éxito das edicións anteriores.
Desde o Concello de Narón e a Asociación Veciñal A Pombiña fan un chamamento á veciñanza de Pedroso e de toda a comarca para que non falte a esta cita xa consolidada no calendario estival do municipio.
