Galicia Ártabra Digital Noticias de Ferrol y la comarca de Ferrolterra.
O investimento, de 1,1 millóns de euros, xa está consignado nos Orzamentos 2026 e o proxecto atópase en fase avanzada de redacción. Consitirá na ampliación e mellora integral da actual estrada DP 7703 no tramo entre Medoñas e Ponte Souto (Aparral).
A Deputación da Coruña avanza na creación dun novo acceso directo a As Pontes desde a autovía AG-64, mediante a ampliación e mellora integral da estrada provincial DP 7703, no tramo entre Medoñas e Ponte Souto (Aparral).
O proxecto, que conta cun investimento previsto de 1,1 millóns de euros xa consignados nos Orzamentos 2026, atópase nunha fase de redacción avanzada, o que permitirá iniciar as obras ao longo do vindeiro ano.
Segundo explicou o presidente da Deputación e alcalde das Pontes, Valentín González Formoso, o obxectivo é transformar a DP 7703 “nun vial de acceso amplo, seguro e rápido ao centro da vila desde a autovía, evitando que o tráfico teña que atravesar o polígono industrial de Airios”.
Formoso visitou a zona acompañado polo concelleiro de Obras, Infraestruturas, Medio Ambiente e Medio Rural, Roberto Rivera, e por técnicos de Vías e Obras da institución provincial.
Unha resposta a unha demanda histórica do territorio
Formoso incidiu en que estas obras darán resposta a unha antiga demanda das asociacións veciñais de Chamoselo e Aparral, así como dos empresarios instalados no polígono de Airios, “creando un acceso amplo, seguro, cómodo e rápido entre a autovía e o centro da vila”.
O presidente lembrou que o tránsito pola estrada que cruza o polígono xera problemas de seguridade nunha área empresarial moi activa, con máis de 35 compañías e preto de 400 traballadores que utilizan a vía a diario, ademais do tráfico pesado propio dun polígono industrial.
“Con este novo acceso melloraremos a seguridade, reduciremos molestias ás empresas e ofreceremos unha entrada máis cómoda e fluída cara ao centro de As Pontes”, engadiu.
Mellora do trazado e eliminación de puntos perigosos
O proxecto prevé a eliminación das curvas pronunciadas nos primeiros quilómetros da estrada (PK 1+1011 e PK 1+810) e a ampliación da plataforma en todo o tramo, garantindo condicións de circulación óptimas para o tráfico procedente da autovía AG-64 Ferrol-Vilalba.
Ao estar xa incorporado aos Orzamentos 2026, o proxecto conta con calendarización garantida.Unha vez executado, este novo acceso converterase nunha infraestrutura estratéxica para a mobilidade, a seguridade viaria e o desenvolvemento económico do Concello de As Pontes e da súa área de influencia.
