A banda Böj presenta no teatro Jofre o seu novo traballo discográfico

A formación, con raíces na comarca, consagra o seu estilo de folk tradicional  nun disco honesto, vibrante e conectado co mundo que a rodea. As entradas xa están disponibles na web de Ataquilla e na billeteira do Jofre.

A banda orixinaria de Ferrolterra Böj presentará este domingo ás 19:00 horas no teatro Jofre o seu novo disco: Hora Zulú.

Un traballo de estudo no que se condensa toda a aprendizaxe desta formación ao longo de máis de dúas décadas de traxectoria, e que representa unha evolución natural do seu son. Ademais, o disco está concebido coma unha declaración de intencións: un compromiso coa tradición, a investigación, a audacia e a emoción.

Con esta nova proposta musical, Böj consagra a súa visión sobre o folk actual, nunha viaxe musical sen prexuízos por diferentes latitudes, percorrendo desde o norte de Europa ata o norte de África. A banda segue mantendo o seu compromiso coa súa filosofía internacional e innovación musical firmemente arraigada na tradición.

Böj está integrada por Ricardo Mouriño, Fausto Escrigas, Rubén Gómez, Pablo Vergara e Cibrán Seixo. Todos eles contan con amplia experiencia tanto na escena folk como noutros xéneros como o reggae, o jazz, ou o pop-rock, o que contribúe a dotar á banda dunha sonoridade rica, versátil e chea de personalidade.

Desde os seus inicios, Böj actuou en salas e festivais de todo o país e do extranxeiro, sendo recoñecidos polo seu potente directo, o seu enfoque creativo e a súa fidelidade a unha tradición que saben reinterpretar con liberdade e respecto.

As entradas poden adquirirse na billeteira do teatro Jofre e na web de Ataquilla.