O programa Ondas de Sabor dá a coñecer os produtos do mar a través dun showcooking na casa da cultura de Valdoviño

O Concello organizou a iniciativa co apoio das axudas concedidas polo GALP.

O proxecto Ondas de Sabor, impulsado polo Concello de Valdoviño, celebraba onte á tarde unha sesión formativa dirixida á hostalaría local, pero aberta ao público en xeral, centrada nas posibilidades culinarias dos produtos locais do mar. A actividade tivo lugar na sala de exposicións da Casa da Cultura e estivo dirixida polos cociñeiros Diego Fernández e Jordi Fernández, do restaurante Fame Kanalla.

A concelleira de Cultura e Turismo, Rosana García, daba a benvida aos asistentes ao encontro, que contou cunha boa acollida, con arredor de 35 persoas participantes. Durante o showcooking, puideron coñecer novas formas de incorporar o produto do mar KM 0 nas súas cociñas, degustando dúas elaboracións especialmente deseñadas para a ocasión:

-Mexillóns ao vapor de albariño sobre sopa de curry malabar, con cebola encurtida e lascas de coco relado crocante.
-Hot dog coreano crocante de pescada do pincho asada ao carbón, acompañado de vermicelli en ensalada de cítricos, menta e maionesa de lima.

Esta acción forma parte do proxecto “Ondas de sabor: promoción do consumo de percebe e bivalvos de Valdoviño”, un proxecto promovido polo Concello de Valdoviño co apoio do Fondo Europeo Marítimo, de Pesca e Acuicultura (FEMPA) a través das axudas concedidas polo Grupo de Acción Local Pesqueira (GALP) A Mariña – Ortegal na convocatoria ordinaria de 2023..