O Concello de Valdoviño amplía a rede de espazos cardioprotexidos cun equipo DESA no campo de fútbol de Meirás

A día de hoxe, o municipio conta con máis dunha vintena de equipos situados en outros tantos emprazamentos das 8 parroquias.

O Concello de Valdoviño continúa ampliando a rede de espazos cardioprotexidos da localidade, e estes días, procedía á instalación dun novo equipo DESA no campo de fútbol Misael Prieto de Meirás. Deste xeito, avanza no seu obxectivo de sumar emprazamentos estratéxicos, de modo que o tempo de acceso a estes equipos por parte da veciñanza non exceda os 5 minutos, o máximo de actuación que concede a cadea de supervivencia.

O alcalde, Alberto González, que supervisaba a instalación xunto aos concelleiros de Deportes, Sergio Saavedra, e Servizos, Benito Vega, agradecía a colaboración do Meirás CF para activar este novo punto, integrado por desfibrilador, vitrina, sinaléctica, kit de reanimación e placa identificativa.

Deste xeito, o equipo incorpórase a unha rede formada por outros emprazamentos estratéxicos como o Punto de Atención á Infancia-Aula da Natureza, as escolas unitarias de Taraza, Vilarrube e Lago; a casa consistorial, a casa da cultura; o centro sociocomunitario de Valdoviño, o local social de Sequeiro -sede da Escola de Música-, o local social de Loira -sede da Aula de Artes Plásticas-, o local social de Vilaboa -sede da Aula de Cerámica-; as casetas de socorrismo das praias do Río e Campelo en Meirás, de Vilarrube, do Baleo e Pantín, e Frouxeira; no pavillón municipal, no centro As Forcadas, no campo de fútbol de Mourente e na piscina municipal de Lago.

Ademais, a Policía Local conta cun equipo propio adaptado ao seu vehículo, e o Concello entregáballe un en idénticas condicións á Garda Civil. A relación complétase co do CPI Atios, cuxa instalación impulsaba hai anos a ANPA Beiramar a través dunha campaña solidaria que contou coa colaboración do propio Concello e a implicación de toda a veciñanza.