Novo premio nacional para a enfermaría da ASF por un traballo sobre sarcopenia de desnutrición

Nesta ocasión foi un primeiro premio no Congreso da Asociación Española de Enfermaría de Cardioloxía, que se celebraba entre o 23 e o 25 de outubro en Granada.

Novo premio a nivel nacional para a Enfermaría da Área Sanitaria de Ferrol-ASF. Nesta ocasión, foi no Congreso da Asociación Española de Enfermaría de Cardioloxía, que se celebraba hai uns días, entre o 23 e o 25 de outubro, en Granada. Unha comunicación tipo póster de profesionais desta Área recibiu un primeiro premio e aborda a Sarcopenia e desnutrición na insuficiencia cardíaca: o inimigo silencioso en cardioloxía e Medicina Interna.

Os autores son Carlos Javier Martínez Louro, Eulalia Pena Núñez, Laura López Varela, Ana López Salgado, Alicia Caneiro Rodríguez e Daniel Pérez López do Servizo Cardioloxía, que traballaron con datos recompilados nos andares de Cardioloxía e Medicina Interna do Complexo Hospitalario Universitario de Ferrol.

A Insuficiencia Cardíaca asóciase a desnutrición e sarcopenia, que é o trastorno do músculo esquelético relacionado coa perda da función e da masa muscular; e estes son factores que incrementan a morbimortalidade, os reingresos e as estadías hospitalarias dos pacientes con esta patoloxía, minorando a súa calidade de vida. Segundo explican no seu traballo galardoado a nivel nacional, “a detección precoz é clave e o persoal de enfermaría xoga un papel fundamental no cribado e seguimento”.

Polo tanto, o obxectivo do estudo foi avaliar a prevaleza da sarcopenia e a desnutrición en pacientes hospitalizados con Insuficiencia Cardíaca no Complexo Hospitalario Universitario de Ferrol; e implementar un circuíto multidisciplinar de cribado e intervención durante a hospitalización, así como o seu posterior seguimento nas Unidades de Cardioloxía e Medicina Interna. O ingreso por Insuficiencia Cardíaca, subliñan, é “unha oportunidade para identificar pacientes en risco e establecer intervencións nutricionais e/ou de exercicio para mellorar o seu prognóstico e a súa calidade de vida”.

Análise da situación da situación e intervencións
Estes profesionais da Área Sanitaria de Ferrol realizaron un traballo prospectivo e unicéntrico, entre xuño e decembro do pasado ano 2024, con 92 pacientes dos servizos de Cardioloxía e Medicina Interna, de entre 76 e 84 anos. Fixeron unha análise e seguimento cunha serie de ferramentas e diferentes cribados propios para isto. Como, por exemplo, o SARC-F que é un cuestionario de proba de detección de sarcopenia, cuestionarios de capacidade funcional, dinamómetros para avaliar a forza muscular, ou medicións antropométricas. O 59,8% do total dos pacientes beneficiouse dunha intervención nutricional. Así mesmo, detectouse un 29,3% de pacientes con Sarcopenia que recibiron un programa de exercicios específico.

No caso daqueles pacientes con risco de desnutrición, levaron a cabo un rexistro nutricional diario para determinar requirimentos e establecer a intervención máis adecuada, axustando dietas e adición de suplementos segundo as necesidades. No caso dos pacientes con Sarcopenia, incluíronse nun programa de exercicios específicos, en colaboración co Servicio de Rehabilitación e Fisioterapia. Estes tests de cribado e as intervencións realizadas integráronse na historia electrónica do paciente.

Estas profesionais concluíron no seu traballo premiado a nivel nacional que a desnutrición e a sarcopenia son condicións frecuentes e infradiagnosticadas en pacientes con Insuficiencia Cardíaca, especialmente en pacientes con varias patoloxías e de máis idade. “A súa detección temperá mediante cribado é crucial para a posta en marcha de intervencións nutricionais e/ou de exercicio que melloran o seu prognóstico e calidade de vida”, subliñan.