Revela: Unha xornada para conocer As Pontes a través da fotografía reúne a participantes de toda Galicia

As Pontes acollerá o vindeiro 4 de outubro unha xornada formativa e experiencial dirixida a persoas amantes da fotografía, tanto afeccionadas como profesionais, que desexen mellorar as súas habilidades, compartir coñecementos e descubrir a riqueza visual e natural do concello desde unha nova perspectiva.

A actividade, organizada polo Concello das Pontes en colaboración con Fotowalk Galicia, leva por título “Revela” e está deseñada como unha experiencia inmersiva e práctica, cun enfoque creativo e técnico. A cita reunirá a 50 participantes, procedentes de toda Galicia, e estará guiada polo recoñecido fotógrafo profesional Xosé Durán.

A xornada dará comezo pola mañá na Casa Dopeso cunha Masterclass sobre iluminación natural en exteriores, na que Xosé Durán abordará técnicas para controlar a luz, evitar sombras indesexadas e acadar retratos en exteriores cun alto impacto visual. A continuación, desenvolverase un obradoiro práctico en interior centrado no uso de flashs e esquemas de iluminación creativa, ideais para destacar suxeitos ou produtos, e para a creación de escenas con narratividade visual. Esta parte da actividade está pensada como un espazo para experimentar e afondar na expresión persoal a través da fotografía.

Xa pola tarde, a partir das 15:00 horas, terá lugar un camiño fotográfico guiado, de aproximadamente tres horas de duración, por algúns dos enclaves naturais máis destacados do municipio, como o lago das Pontes, a contorna do río Eume e outros espazos de gran valor paisaxístico. Durante o percorrido, as persoas participantes contarán co acompañamento dun guía local e de Xosé Durán, quen ofrecerá asesoramento técnico e creativo en tempo real, axudando a aplicar os coñecementos adquiridos ao longo da xornada.