Galicia Ártabra Digital Noticias de Ferrol y la comarca de Ferrolterra.
O executivo local proxecta unha nova senda que unirá o núcleo da parroquia co cemiterio das Congostras.
O alcalde das Pontes, Valentín González Formoso, acompañado polo concelleiro de Obras e Urbanismo, Roberto Rivera desprazouse, esta semana, ata a parroquia de Goente para supervisar o avance das obras de mellora de servizos e seguridade viaria na estrada AC-564, na súa marxe dereita, ata as inmediacións da empresa Conde S.L.
Durante a visita, o rexedor destacou a importancia desta intervención para a mellora da calidade de vida da veciñanza e anunciou que o Concello está xa a traballar nun novo proxecto que permitirá conectar, a través dunha senda, o núcleo da parroquia de Goente co cemiterio das Congostras, dando resposta a unha demanda histórica da veciñanza e reforzando a seguridade peonil.
As obras actualmente en execución, cun investimento de 150.658 euros financiados pola Deputación da Coruña, abranguen a reposición dos servizos de saneamento, abastecemento e iluminación, así como a mellora da beirarrúa existente entre os puntos quilométricos 17.200 e 17.800, dando continuidade á mellora integral desta vía, iniciada no ano 2019 coa intervención na marxe esquerda.
O proxecto inclúe a creación dunha nova rede de saneamento con pozos de acometida e de rexistro, o desdobre da rede de abastecemento para separar a liña xeral da rede municipal da liña de repartición domiciliaria, e a instalación de canalización para o alumeado público, con arquetas de rexistro.
No ámbito da seguridade viaria e accesibilidade, inclúe a reposición e ampliación da beirarrúa existente nos tramos necesarios, empregando formigón continuo armado con malla e acabado antiescorregadizo, coa mesma cor que a beirarrúa da marxe esquerda.
Tamén se instalarán pasos de peóns con baldosa regulamentaria e renovarase a sinalización horizontal e vertical, así como o mobiliario urbano.
