Programación do CIRS de Cervás, Ares, para o mes de maio

Desde o CIRS de Cervás vai desenvolverse unha intensa programación neste mes de maio, ao redor da celebración do DIA DAS LETRAS adicado ao recoñecimento da nosa tradición oral, das cantareiras e das persoas que mantiveron e dignificaron a nosa música tradicional.

A programación comeza este mércores 14 ás 19,30 horas,  coa presentación do libro-disco «Cancioneiro galego serodio» da autoría do investigador, divulgador e músico galego Xabier Díaz, que nos explicará a xénese e resultado dese traballo de recopilación feito entre os anos 1989 e 2012; na compaña dalgunha cantiga.

 

Continuará a programación cunha actividade adicada preferentemente ás crianzas, que o venres día 16 a partir das 17 horas elaborarán un mural con motivos relacionados coa música tradicional: cantareiras, bailador@s, gaiteir@s…; a xeito de homenaxe a todas esas persoas que dignificaron as nosas músicas.

 

O domingo 25 será un día cunha intensa e completa programación; que dará comezo cunha sesión vermú a partir das 13 horas nas instalacións do CIRS, na que intervirán a Escola de pandeireter@ da «Agrupación Instrutiva» de Caamouco e o Grupo folk «As Pías», que presentará o seu proxecto «Tradicorda».

 

A xornada nese día rematará cun xantar de confraternidade (mexillóns e paella) a prezos populares, para o que a xente pode apuntarse na cantina do CIRS.

 

Finalizará a programación o sábado día 31 a partir das 19,30 horas no que Xosé L. Rivas «Mini» (ex Fuxan os Ventos e A Quenlla) oferecerános unha viaxe pola música tradicional galega; que arroupará con historias e cantigas diversas.