Iván Puentes, subcampión galego de dúatlon e bronce por clubs co Triatlón Ferrol

Juanchi González Orozco fíxose co campionato galego de veteranos 2.

O Triatlón Ferrol logrou tres medallas no campionato galego celebrado este sábado 3 en Vimianzo coa prata de Iván Puentes, o bronce na clasificación por clubs e o ouro en veteranos 2 de Juanchi González Orozco.

O ferrolán Iván Puentes comezou marcando un ritmo alto nos 5 km de carreira iniciais. No ciclismo foi dando remudas cos seus máximos rivais, os lucenses Esteban Basanta e Jarno Pousada. Á saída da segunda transición, os tres comezaron a correr esprintando para marcas posicións e Puentes só foi superado por Pousada, que empezou a correr a un ritmo por debaixo de 3 minutos o quilómetro.

O Triatlón Ferrol, grazas ao tempo de Iván Puentes, e de Hugo Prida -17o- e Pablo Pedrosa – 31o-, entrou en postos de podio sendo o terceiro mellor club. Completaron a participación departamental Chespi Pena -35o-, Juanchi González -40o da xeral e o mellor en veteranos 2-, Roberto Martínez -47o- e Mario López -64o-.

Na proba do circuíto superesprinte de categorías menores, o cadete Adrián Canosa foi terceiro.