Galicia Ártabra Digital Noticias de Ferrol y la comarca de Ferrolterra.
Moeche está ás portas da celebración da Feira do 23 de Abril, xornada da tradicional dedicada aos cabalos. A Feira do 23 de Abril é sinónimo de cabalos de todos os tipos e razas que chegan a Moeche para lucir estampa e nobreza ou para cambiar de mans.
Una nova edición organizada pola Asociación Ecuestre 23 de Abril, quen xa ten ben avanzados os preparativos para a celebración. Repartiranse 3.650 euros en premios para os xinetes e amazonas que demostren máis pericia na andadura chapeada e andadura serrada, divididas en 2 apartados para animais de menos e máis de 1,5 m de altura á cruz, así como, a manada máis numerosa, e estampa beleza .
O Concello compromete a súa colaboración económica e loxística na organización do evento, que no apartado económico se traduce nunha subvención directa de 6.000€ ao que lle hai que sumar os gastos que o concello asume como propios (ambulancia asistencial, aluguer e transporte de valos, conexións eléctricas e a coordinación de seguridade) que roldan os 4.000€. Esta colaboración plásmase na sinatura dun convenio de colaboración que, tras presentar toda a documentación por parte da entidade, se asinará o luns 21.
No marco do compromiso de coordinación da seguridade o Concello convocou unha reunión a comezos de abril á que asistiron a alcaldesa, Beatriz Bascoy, os concelleiros de Medio Ambiente e Desenvolvemento Local, Miguel Pedreira e Cristina García, a presidenta da Asociación Ecuestre 23 de Abril, Noelia Castro, ademais do sarxento do posto da Garda Civil de San Sadurniño, a representante da empresa que deseñou o plan de prevención e persoal de coordinación dos distintos equipos de Protección Civil que botarán unha man o próximo mércores, procedentes do Concello das Pontes, Neda, Narón e Valdoviño.
Desde o Concello «agradécese a implicación de todos estes equipos para que todo transcorra sen incidencias, ao Concello das Pontes e ao Concello de San Sadurniño polo apoio loxístico e, ao tempo pídeselle a máxima colaboración á veciñanza, visitantes e participantes co obxectivo de que o 23 de Abril siga sendo o que é sempre, un éxito».
A Asociación Ecuestre 23 de Abril, entidade organizadora, abriu as inscricións nas distintas probas vía telemática, como sen vén facendo nos últimos anos, xa hia unhas semanas . Entres as novidades presentadas pola asociación nesta nova edición, figura o límite de inscricións, inicialmente, a 160 cabalos participantes nas probas de andadura así como un novo premio, o concurso de fotografía, do que saíu a imaxe do cartel da feira.
Como é habitual, as persoas participantes deberán levar o animal canda a súa documentación oficial para facer as medicións pertinentes. As bases estipulan, entre outras cuestións, a obriga de usar cascos regulamentarios para poder participar nas probas e a descualificación inmediata no caso de que haxa indicios de maltrato animal. Ademais, tanto a organización como as forzas de seguridade poderán expulsar a calquera participante que estea facendo un uso inadecuado da pista ou se se considera que pon en risco a seguridade da proba, que se desenvolverá nun circuíto debidamente valado e restrinxido á entrada do público.
A Asociación Ecuestre 23 de Abril premiará os animais que mellor desempeño exhiban en dous xeitos de marcha que requiren tempo de adestramento e moita compenetración coa montura. Son a andadura chapeada -o animal avanza en catro tempos, poñendo cada vez un casco no chan-, e a andadura aserrada -os cascos de cada lado pousan ao mesmo tempo mentres os outros se adiantan. Estas 2 categorías desdobraranse á súa vez dependendo das alturas, separando as probas para animais de menos de 1,5 metros de altura á cruz e para os que excedan desa medida. Repartiranse premios tamén, a estampa e beleza e á manada máis numerosa
Rúas cortadas e pases de acceso para os residentes.
O Concello agradece a colaboración da veciñanza que cede o uso de parcelas para esa xornada como aparcadoiros, e lembra que a rúa da Feira estará cortada durante todo o 23 de abril. As persoas residentes na rúa da Feira poden continuar recollendo o pases de acceso na Casa do Concello .
Desde o martes 22 pola tarde até a noitiña do mércores 23 tamén se cortará o tráfico no tramo de estrada entre Pensos Pazo e a capela de San Ramón, xa que é nesa zona onde se sitúa o circuíto e onde se concentra a maior actividade cabalar. O propio dia 23 estará cortado o paso de vehículos (excepto para a zona de aparcadoiro) desde a avenida 23 de abril, á altura de Agromera , e na rúa da Feira , desde o cruce en Casa Sixto , ata o cruce coa pista dirección Pardiñas, A Corveira e AC 862.
Zonas de aparcadoiros e accesos
Establécense varias áreas de aparcadoiros, outras para os remolques e vehículos de transporte de cabalos para o trato e outras para os cabalos da carreira; ademais de zonas especificas para cabalos.
Os accesos a zona do recinto feiral establécense, coma sempre, polo cruce da AC-862 coa estrada provincial DP 4901 ( zona do CEIP San Ramón), dirección de entrada, e a saída pola avenida 23 de abril.
Para os participantes na carreira o acceso será polo cruce da estrada provincial Balocos a Somozas coa DP 4901. ao seu paso polo campo municipal de fútbol , cunha soa dirección cara ao recinto da carreira. A estrada paralela esta (a “da antiga biblioteca”) será dunha soa dirección, de saída desde a zona da carreira cara á estrada Somozas Balocos.
Poderán acceder tamén desde a estrada que vén da zona de Vilanova, para situarse no aparcamento R2, mentres os camións de gando continuarán ata a nave do gado no propio recinto feiral.
