Galicia Ártabra Digital Noticias de Ferrol y la comarca de Ferrolterra.
Do 4 ao 22 de abril a sala de exposicións temporais da Casa da Cultura de Fene acolle a exposición do XVIII Premio Internacional Jesús Núñez, convocado pola Deputación da Coruña.
A mostra recolle unha selección dos mellores traballos presentados a este concurso internacional de arte gráfico. Nesta edición houbo 118 participantes, dos cales 58 foron españois (15 madrileños e 13 galegos) e os 60 restantes procederon doutras 18 nacionalidades, sobre todo de México (14), Italia (11), Arxentina (9) e Polonia (8). O Premio Internacional Jesús Núñez pretende poñer en valor o talento creativo e a figura do artista Jesús Núñez, así como apoiar a novos talentos nacionais e extranxeiros da arte gráfica.
O traballo que resultou gañador desta edición foi «10 grados», de Juan Carlos Escudero García, obra que pon ao espectador ante a inmensidade da representación dunha vista aérea e etérea do océano e a concreción da fluidez da auga como elemento. Tamén se outorgaron dous accesits a Mateusz Patrzyk por «Painbody» e a Maite Pinto, por «Vero Over».
Horario de visitas á exposición: de luns a venres, de 10 a 13 e de 16 a 21 horas, e os sábados, de 10 a 13 horas (agás durante a Semana Santa que o horario será: de luns a venres, de 10 a 14.15 horas. Sábados, domingos e festivos, pechado)
