Galicia Ártabra Digital Noticias de Ferrol y la comarca de Ferrolterra.
A décima edición do Galicia Fórum Gastronómico clausúrase no recinto ExpoCoruña con máis de 23.000 visitantes, segundo informa a organización, que fai un balance «moi positivo».
«Unha edición que se converteu na mellor #gastroexplosión», en palabras da súa directora, Ana Trevisani, quen explicou que «este ano celebrabamos a súa décima edición na nosa terra e queriamos que fose moi especial, pese ao esforzo que supoñía facer unha edición extras tan só doce meses despois da anterior».
«Pero puidemos comprobar que mereceu a pena, especialmente polo nivel de programa e relatores que conseguimos ter«, recalcou. «Estamos orgullosos dos grandes nomes internacionais que quixeron viaxar a Galicia e ademais envorcáronse co noso proxecto do Fórum«, afirmou Ana Trevisani.
Na mesma liña expresouse Pep Palau, director de programa, quen destacou que «esta foi sen dúbida a edición que presentou un dos mellores programas da historia do Fórum en honra a ese décimo aniversario» engadindo que «á beira dos grandes cociñeiros xa consagrados tivemos a oportunidade de ver en directo a cociña que vén, eses mozos que naceron co Fórum e que hoxe están en auxe»
Tres días, 30 actividades, 6 chefs e 10 mostradores de exposición de produtos locais, así como outras actividades complementarias como mesas redondas, talleres e entregas de premios. Remata unha edición máis do Galicia Fórum Gastronómico, onde a Deputación da Coruña participou cunha ampla e ambiciosa programación destinada a “poñer en valor a nosa gastronomía, os nosos produtos e o talento dos profesionais do sector agroalimentario”, sinalou o vicepresidente, Xosé Regueira, que, ademais, valorou moi positivamente esta décima edición “dun evento que xa é de referencia internacional”.
“Estar en Fórum” afirma Regueira “é ter a convicción de que imos estar no mellor escaparate da nosa gastronomía, que nos permite non so poñela en valor, senón tamén reivindicar os nosos produtos e o noso territorio”. “A provincia da Coruña”, engadiu o vicepresidente, “é un destino turístico auténtico que alberga pequenas peculiaridades que o fan único, como a nosa xente e as nosas paisaxes. E hoxe é máis importante ca nunca, se cabe, defender a preservación desa autenticidade”.
Actividades da última xornada no stand
Na xornada deste martes 25 as cociñeiras Lucía Freitas (A Tafona, Santiago de Compostela) e Naír Naír González (Muelle 43, Mugardos) protagonizaron os showcookings deste último día no stand da Deputación, onde tamén participaron ofrecendo degustacións e presentacións San Isidro Bakery e Cafés Lúa; A Despensa d`Lujo; Martietas de Fío; Vánagandr e Chichalovers.
Os produtores presentes no stand provincial destacaron a «visibilidade» que supón para eles a participación en foros como este Galicia Fórum Gastronómico, e tamén as «sinerxías» que se establecen entre eles, que impulsan ademais «o noso crecemento e recoñecemento, pois xuntos somos máis«, explicaron.
Mostra diso foi a participación de Carmela, de Queixo Galmesán, no showcooking de Lucía Freitas, que empregou o seu queixo premiado internacionalmente nun dos pratos que elaborou: porro á brasa, avelá, xema curada e escuma de Galmesán.
Talleres
Ademais das actividades que se desenvolveron no espazo provincial, a Deputación tamén organizou talleres nos espazos «Taller» e «Ágora».
Nesta última xornada, foi o caso de ‘Cociña moderna vs. Cociña tradicional: un debate culinario’ con Xurxo Agrasar e Eva Fares (As Garzas, Malpica) e Dolores García e Noelia Rodríguez (Casa Peto, Outes) e ‘Costa da Morte: esencia e territorio’, con Pepe Formoso, Miguel Silvarredonda, Emilia Iglesias e Martiño Santos, da Asociación de Profesionais de Turismo Costa da Morte.
PROTAGONISTAS
A xornada de clausura tivo como protagonista as verduras coas actuacións estelares do xaponés Kanji Kobayashi, quen tivo de anfitrioa á cociñeira Lucía Freitas, e que puxo no Fórum o punto final ao seu percorrido por Galicia, e a sesión de Xavier Pellicer, valedor do Premio ao Mellor Restaurante de Verduras do Mundo en 2018 e 2019.
Ademais, a xornada contou coa participación de catro grandes da cociña galega Axel Smyth, Iñaki Bretal, Pepe Solla e Javier Olleros, encargado este último da sesión de clausura.
Por outra banda, a axenda do martes tamén incluíu varios recoñecementos, como os do concurso Desafío Xchef by Cervexas 1906, organizado por Estrella Galicia, e cuxa gañadora foi Fátima Olga Otero, do Paprica de Lugo, co proposta ‘Touciño asado, pesto de grelos a coitelo e mollo balsámico de 1906 Black Coupage’.
Entrega de premios
Así mesmo, ao longo da mañá desenvolveuse o II Concurso de Empanadas Galicia Fórum Gastronómico, que contou cunha altísima participación que afianza e consolida o concurso, e cuxos gañadores foron Inés Martínez e John Ferrer, do CIFP Manuel Antonio, que se alzaron co primeiro na categoría de Estudantes; o segundo para Moraima Núñez e Héctor Soto, do CIFP Álvaro Cunqueiro; e o terceiro premio foi outorgado ao alumno do CIFP Compostela, Sebastián Castro.
Na categoría profesional proclamouse gañadora a Empanadería Cantón de Ortigueira, en segundo lugar quedou o Club Santo Domingo de Pereiro de Aguiar e en terceiro posto a Panadería Casa Zapateiro de Mesía. Un dos actos foi a entrega dos Premios Picado, presidida polo conselleiro do Mar, Alfonso Villares.
Os mesmos foron outorgados a Celestina Martínez, de O Parrulo (Ferrol), na categoría Cociña; na categoría Sala, o premiado foi Berto Domínguez, á fronte do mítico restaurante D’Berto (O Grove); na categoría Viño, o premio foi para Joaquín Álvarez «Quin», do Rosal; en canto á categoría Produtor, no caso de Mar, o recoñecemento recaeu en Ou Peirao-Federación Galega de Redeiras Artesás (Malpica de Bergantiños), mentres que no apartado Rural o premiado foi Jesús Simal Gándara.
Tamén foron distinguidas oito panaderías: Panadería Pallares (Sarria, Lugo, 1876); Panadería Germán (Fisterra, A Coruña, 1870); Panadería Rabizas (Betanzos, A Coruña, s XVII); a centenaria Panadería Paleo (Ribadeo, Lugo); Forno do Calviño (San Cristovo de Cea); Sieira Charlín (Ribeira, A Coruña, 1884); Panadería Central (Buño, Malpica) e Panadería Caneda (A Pobra de Trives, Ourense), co Premio ás Panaderías Históricas de Galicia.
OUTRAS PROPOSTAS
Todo iso nunha edición na que Estrella Galicia presentou os avances do seu proxecto para facer máis sostibles os establecementos hostaleiros do noso país, Cervexarías Circulares.
Ademais, a Organización de Produtores Pesqueiros de Burela promocionou os produtos pesqueiros das súas frotas.
Pola súa banda, na súa visita, o conselleiro do Mar, Alfonso Villares, enxalzou esta cita gastronómica como «escaparate de excepción dos produtos pesqueiros, así como da riqueza e o sabor que hai detrás da despensa atlántica». Destacou tamén a presenza de produtos do mar, á vez que incidiu na importancia de promover hábitos de alimentación saudables.
