Galicia Ártabra Digital Noticias de Ferrol y la comarca de Ferrolterra.
O Concello de Fene, a través da área de igualdade que dirixe Sandra Permuy, está a ultimar a programación especial do 8 de Marzo -Día Internacional da Muller- cunha campaña que leva por lema “Elas, escríbese en feminino”. A iniciativa busca recoñecer e visibilizar o papel fundamental das mulleres na historia, na sociedade e no desenvolvemento comunitario, poñendo o foco na súa memoria, traballo e loita pola igualdade.
A concelleira de igualdade, Sandra Permuy, destacou que “este ano queremos facer unha homenaxe especial ás mulleres das nosas sociedades e entidades veciñais, verdadeiros motores incansábeis que demostran que o crecemento persoal e colectivo pasa pola unión de esforzos cara un obxectivo común. O seu compromiso merece ser recoñecido e posto en valor”.
Actividades na véspera do 8M
Este 7 de marzo, véspera do Día Internacional da Muller, desenvolveranse diversas actividades para dar inicio á conmemoración. O Concello de Fene acollerá o acto institucional no que inaugurará un mural en croché, elaborado por veciñas de Fene como homenaxe ás mulleres que dedicaron a súa vida á reivindicación dos seus dereitos, coidadoras incansábeis que, con paixón e tenacidade, axudaron a construír unha sociedade máis xusta.
Outra das actividades prevista é unha homenaxe ás mulleres das sociedades locais, recoñecendo a súa contribución social e comunitaria a través da “Árbore da vida” do espazo “Sementando igualdade”, situado ao pé do Concello.
O programa inclúe tamén un obradoiro dirixido a mulleres que servirá como presentación oficial do xogo “O latexo das bolboretas”, unha iniciativa creada polo Concello de Fene. Este xogo de mesa busca fomentar a reflexión, o autocoñecemento, a autoestima e o empoderamento, ofrecendo unha ferramenta dinámica para traballar a igualdade. Tras a súa presentación, será distribuído gratuitamente en sociedades, centros educativos e outras dependencias municipais.
Ademais, o Concello de Fene decorará en morado as sociedades e, en colaboración coa Asociación de Comercio, Hostalaría e Servizos “O Cruceiro”, acordou que os establecementos adheridos tamén se sumen a esta iniciativa, especialmente aqueles que participan no Outlet de Fene, que terá lugar esa mesma fin de semana. Así mesmo, o Concello anima ao resto de comercios e negocios locais a unirse a esta acción simbólica para reforzar a visibilización e o apoio á igualdade.
Sandra Permuy subliñou que esta campaña «non só é un recordatorio da importancia da igualdade, senón tamén unha mostra da vontade activa do Concello por seguir traballando para erradicar calquera forma de machismo, denunciar a violencia de xénero e activar os recursos necesarios para construír unha sociedade máis equitativa e xusta para todas».
Chamamento á mobilización do 8M
O Concello de Fene anima á veciñanza a sumarse ás actividades organizadas polo feminismo galego, entre as que destaca a manifestación convocada en Ferrol o 8 de marzo ás 20:00 horas, unha mobilización clave para seguir reivindicando unha sociedade libre de discriminacións.
Con esta programación, o Concello de Fene reafirma o seu compromiso coa loita pola igualdade, visibilizando e recoñecendo o papel das mulleres na historia e no presente do municipio.
